«Ավրորա» մրցանակաբաշխությանն այսօր՝ ապրիլի 24-ին, էկրանին ցուցադրվել են ղարաբաղա- ադրբեջանական շփման գծում այս օրերին զոհված զինծառայողների լուսանկարները:
Լուսանկարները ցուցադրվել են State Youth Orchestra of Armenia SYOA-ի կատարման ժամանակ:
Նշենք, որ Aurora Prize մրցանակաբաշխությունը ստեղծվել է, որպեսզի Ցեղասպանությունը վերապրած բոլոր հայերի անունից շնորհակալություն հայտնի փրկիչներին: Հարյուր տարի առաջ նրանց դրսեւորած քաջության հիշատակին մրցանակով պարգեւատրվելու են ժամանակակից հերոսները, որոնք վտանգում են իրենց կյանքը հանուն ուրիշների փրկության:
Մրցանակն այս տարի չորս հավակնորդներ ունի։ Նրանք են Մարգարեթ Բարանքիթսը, նյույորքցի բժիշկ Թոմ Քաթենան, Սյեդա Ղուլամ Ֆաթիման՝ Պակիստանից, եւ հոգեւորական Բերնարդ Քինվին՝ Կենտրոնաֆրիկյան Հանրապետությունից։
Հաղթողի անունը հայտնի կդառնա այսօր, իսկ մրցանակը կհանձնի Ընտրող հանձնաժողովի համանախագահ, հայտնի դերասան Ջորջ Քլունին, որը հենց այդ նպատակով ապրիլի 22-ին ժամանել է Հայաստան:
Նշենք, որ «Ավրորա» մրցանակը շնորհելով՝ 100 LIVES նախաձեռնությունը ճանաչման է արժանացնում մերօրյա հերոսներին, որոնք անձնվիրաբար օգնում են մարդկանց: Այն հիմնել են հայ գործարարներ Ռուբեն Վարդանյանը, Նուբար Աֆեյանն ու Կարնեգի կորպորացիայի նախագահ Վարդան Գրեգորյանը:
