ԱՄՆ Կոնգրեսի Ներկայացուցիչների պալատում դեմոկրատական փոքրամասնության առաջնորդ Նենսի Փելոսին Հայոց ցեղասպանության 101-րդ տարելիցի կապակցությամբ հայտարարություն է տարածել:
Հայտարարությունում, մասնավորապես, ասվում է.
«Ավելի քան մեկ դար առաջ, 1915 թվականից ի վեր շուրջ 10 տարիների ընթացքում ավելի քան 1,5 միլիոն անմեղ հայ երեխաներ, կանայք եւ տղամարդիկ ենթարկվել են համակարգված կոտորածների եւ սարսափելի ցեղասպանության Օսմանյան կայսրության ղեկավարների կողմից:
Այսօր մենք հիշում ենք այդ դաժան, անմարդկային էթնիկ զտումների զոհերին: Մենք պատվում են նրանց հիշատակը՝ ճանաչելով անցյալը:
Մենք երբեք չպետք է մոռանանք մարդկային կյանքեր խլած, համայնքեր արմատախիլ արած եւ մի ամբողջ մշակույթ ոչնչացնել փորձած այս թշվառ արշավը:
Շատ հաճախ պատմության ողբերգական հանցագործություններն անտեսվում, փոքրացվում կամ ժխտվում են, սակայն ապագա սերունդների առջեւ մարդկության պարտքն է առերեսվել ցավոտ պատմությանը` առավել հուսալի ապագա ստեղծելու համար:
Հիշատակի այս հանդիսավոր տարելիցի օրը մենք պետք է ընդունենք ճշմարտությունը: Մեր բարոյական պատասխանատվությունն է ամեն օր յուրաքանչյուր համայնքում խոսել մոլեռանդության, խտրականության եւ ատելության դեմ, որոնք այդքան հաճախ սնում են բռնությունը»:
