Ապրիլի 25-ին, ժամը 21.15-ին, ոստիկանության Բազումի բաժնում ահազանգ է ստացվել, որ Վանաձորի Իսահակյան 1-ին նրբանցքի 9 շենքի բնակարաններից մեկում թմրամոլներ են հավաքված, եւ վիճաբանության ձայներ են լսվում:

Ոստիկանության մամուլի ծառայությունից NEWS.am-ին հայտնում են, որ մեկնած օպերատիվ խումբը 51-ամյա Սերոբ Մ.-ի բնակարանի փակ պատշգամբի պահարանի վրա հայտնաբերել է ալյումինե տարա, յոդի դատարկ ապակյա տարա, 3 լուցկու տուփ, 1 տուփ սոդա, 10 մլ տարողությամբ ներարկիչ՝ 2,5 մլ դեղնագորշավուն հեղուկով:

Սերոբ Մ.-ի բնակարանում գտնվող ընկերը` 43-ամյա Նորայր Զ.-ն, հայտարարել է, որ նշվածը պատկանում է իրեն, որոնցով ինքը պատրաստել է ներարկիչի մեջ առկա թմրամիջոցը, որպեսզի ներարկելու միջոցով գործածի:

Նշված բնակարանի փակ պատշգամբից հայտնաբերվել է նաեւ 3 լուցկու տուփ, դատարկ ապակյա տարա, բամբակե տուփ, տուփի մեջ կիսով չափ լցված կերակրի աղ, 20 մլ տարողությանբ ներարկիչ` 10 մլ դեղնագորշավուն հեղուկով:

Սերոբ Մ.-ի բնակարանում գտնվող մյուս ընկերը` 52-ամյա Արթուր Մ.-ն, հայտարարել է, որ նշվածը պատկանում է իրեն, որոնցով ինքը պատրաստել է ներարկչի մեջ առկա թմրամիջոցը, որպեսզի ներարկելու միջոցով գործածի:

Հայտնաբերվածներն ուղարկվել են փորձաքննության:

Կատարվում է հետաքննություն: