Ոչ հեռու ապագայում ՀՀ կառավարությունը կներկայացնի թուրքական ծագումով ապրանքների նկատմամբ միջոցների մասին իր առաջարկները։ Այս մասին ապրիլի 27-ին խորհրդարանում ասել է էկոնոմիկայի նախարար Արծվիկ Մինասյանը։
Վարչապետի հանձնարարականով՝ Էկոնոմիկայի նախարարությունն ուսումնասիրում է ապրանքները, որոնք սպառնում են Հայաստանի ազգային տնտեսությանը որակով եւ մրցունակությամբ։
Հայ-թուրքական տնտեսական հարաբերությունները ուղղակիորեն բխում են քաղաքական հարաբերություններից, եւ այստեղ պետք է միջոցների նոր փաթեթ ներկայացնել, նշել է նախարարը եւ հիշեցրել, որ Հայաստանը ԱՀԿ անդամ է եւ չի կարող կազմակերպության կանոնակարգին հակասող քայլեր ձեռնարկել։ Սակայն այստեղ կարեւոր փաստ կա։ ԱՀԿ-ին անդամակցելիս Թուրքիան հայտարարել էր, թե չի ճանաչում Հայաստանին՝ որպես ԱՀԿ անդամ եւ նրա վրա չի տարածելու այդ կանոնները։
«Իսկ դա նշանակում է, որ մենք ամբողջովին իրավունք ունենք միջոցներ կիրառել մեր տնտեսությունը պաշտպանելու համար։ Խոսքը վերաբերում է գյուղատնտեսական ապրանքներին, թեթեւ արդյունաբերությանը եւ այլն»,- նշել է Մինասյանը։
Երկրորդ բանը, որը պետք է հաշվի առնել, ԵՏՄ-ին Հայաստանի անդամակցությունն է, որտեղ երկրները համաձայնեցնում են իրենց քաղաքականությունը։
«Սակայն նաեւ այդ ամենը հաշվի առնելով՝ Հայաստանը գործիքներ ունի, որոնք թույլ են տալիս առանձին դեպքերում կոնկրետ քայլեր ձեռնարկել։ Դրանք պետք է հստակ հաշվարկել, որպեսզի սոցիալապես պայթյունավտանգ իրադրություն չստեղծվի»,-ճ ասել է նախարարը։
