Ռուսաստանը փորձում է դիվերսիֆիկացնել ռիսկերը տարածաշրջանում, հենելով միաժամանակ Բաքվի եւ Երեւանի վրա: Ինչպես հայտնում է ադրբեջանական APA գործակալությունը, այս մասին հայտարարել է Հետխորհրդային երկրների հասարակական-քաղաքական գործընթացների տեղեկատվական-վերլուծական կենտրոնի տնօրեն, «Վեստնիկ Կովկազա» ինտերնետային կայքի գլխավոր խմբագիր Ալեքսեյ Վլասովը: Նրա խոսքով՝ ՌԴ նախագահ Դմիտրի Մեդվեդեւի այցերը Հայաստան եւ Ադրբեջան, ցույց են տալիս, որ Ռուսաստանը ձգտում է դիվերսիֆիկացնել ռիսկերը: «Հայաստանը, դա տնտեսություն եւ առեւտուր է, աշխարհաքաղաքական ազդեցության հարց, իսկ Ադրբեջանը՝ դա էներգետիկա է: ԼՂ հակամարտությունը այդ դիֆերսիֆիկացիայի շրջանակներում այնքան էլ չի տեղավորվում, քանի որ հնարավոր չէ հակամարտությունը կարգավորել, միաժամանակ պաշտպանելով ե՜ւ մեկին, ե՜ւ մյուսին»,-ասել է քաղաքագետը:
Վլասովն ընդգծել է, որ Ռուսաստանը գործում է «ձվերը պետք չէ նույն զամբյուղի մեջ դնել» սկզբունքով:
«Այս փուլում չեմ տեսնում հակամարտության կարգավորման հեռանկար: Կլինեն երկու երկրների նախագահների պարբերական հանդիպումներ: Եռակողմ հանդիպման ձեւաչափով ՌԴ-ի նախագահի հետ հանդիպումները հնարավորություն են տալիս ձգձգել հակամարտության կարգավորումը, թույլ չտալով ռազմական բաց բախում: Ռուսաստանը պետք է մնա տարածաշրջանում գլխավոր մոդերատոր»,-ասել է քաղաքագետը: Վլասովը կարծիք է հայտնել, որ ԼՂ հարցը լինելու է Աստանայում տեղի ունենալիք ԵԱՀԿ գագաթաժողովի կարեւոր թեման, սակայն բնավ ոչ առաջնայինը, քանի որ այս տարվա ընթացքում այդ հարցում հնարավոր չեղավ հասնել առաջընթացի: «ԵԱՀԿ-ի հերթական գագաթաժողովը ցուցադրական է լինելու: Ղազախստանը ամբողջ տարվա ընթացքում փորձեց ճանապարհային քարտեզ ձեւավորել, սակայն, ըստ իս, դեկտեմբերին այս թեման, եթե իհարկե հնչի, չի լինելու առաջնային թեմաների մեջ: Դրա պատճառն այն է, որ կողմերը մինչեւ վերջ չեն հաղթահարել այն տարաձայնությունները, որոնք նրանց մոտ առկա են»: Քաղաքագետի կարծիքով, կարգավորման գործընթացում դադար է սկսվում: «Հարավային Կովկասում Ռուսաստանի խուսափողական քաղաքականության պատճառներից մեկը Իրանի հետ կապված իրավիճակի սրացումն է»,-ասել է ռուս փորձագետը:
