Հայոց ցեղասպանությունը չճանաչելը անպատժելիություն եւ ցեղասպանությունների կրկնման ռիսկ է ծնում։ Այս մասին ԱՄՆ Կոնգրեսում երեկույթի ժամանակ ասել է Ներկայացուցիչների պալատի միջազգային հարցերի հանձնաժողովի ղեկավար, կոնգրեսական Էդ Ռոյսը, փոխանցում է NEWS.am-ի թղթակիցը։
«Թուրքիային պատասխանատվության կանչելու հարցում միջազգային հանրության անկարողունակությունը անպատժելիության ոգի է ստեղծում, եւ մենք տարածաշրջանում հենց այդ անպատժելիության սանձազերծման ականատեսն ենք»,- ընդգծել է Ռոյսը։
Նրա խոսքով՝ Հայոց ցեղասպանության փաստի շուրջ վիճելն այսօր անիմաստ է, քանի որ վկայություններ եւ փաստեր կան, որոնք ապացուցում են դրա իսկությունը։ «Մենք պետք է այսօր դառնանք այդ ժառանգության մի մասը»,- ասել է Ռոյսը՝ հավելելով, որ շարունակելու է Հայոց ցեղասպանության ճանաչման հարցում նախագահ Ռեյգանի հիմք դրած ավանդույթը։