Հայոց ցեղասպանությունից հարյուր տարի անց էլ Թուրքիայի ղեկավարության մտածելակերպը չի փոխվել։ Այդ մասին Tert.am-ի հետ զրույցումա սել է ԱԳ փոխնախարար Շավարշ Քոչարյանը՝ մեկնաբանելով Թուրքիայի նախագահի վերջին հայտարարությունը:
«Այդ հայտարարությունը խոստովանություն է առ այն, որ Հայոց ցեղասպանությունից հարյուր տարի անց էլ Թուրքիայի ղեկավարության մտածելակերպը չի փոխվել: Թուրքիայի նախագահը փորձում է սպառնալ Հայաստանին՝ կապակցելով Թուրքիայում բնակվող հայության կախվածությունը երկրի իշխանություններից եւ այս տարվա ապրիլի 24-ին արված իր ժխտողական հայտարարությունը»,- նշել է Քոչարյանը:
«Ըստ այդ հայտարարության՝ Ադրբեջանը նման չէ ոչ հարեւան պետություններին, ոչ էլ Ուկրաինային: Մնում է ավելացնել, որ Ադրբեջանը իր այլատյացությամբ, ապակայունության եւ արյունահեղության ալիք տարածելու մոլուցքով ու ցեղասպան մոտեցումներով նման է եւ նույնական մեկ պետության՝ Թուրքիայի հետ:
Թե Անկարայի, թե Բաքվի նմանատիպ ջղաձիգ հայտարարություններն արտահայտությունն են իրենց ռասիստական քաղաքականության արդյունքում միջազգային ասպարեզում խորը մեկուսացման մեջ հայտնվելու սարսափի»,- ասել է ԱԳ փոխնախարարը:
Նշենք, որ Թուրքիայի նախագահ Ռեջեփ Թայիփ Էրդողանը հայտարարել է, թե Հայաստանի նախագահը կրակի հետ է խաղում՝ հայտարարելով, թե պատրաստ է Ադրբեջանի հետ պատերազմին։ Էրդողանը կրկին պնդել է, թե Թուրքիայում 100 հազար հայ կա, որոնցից 50 հազար Հայաստանից են։
