Վրաստանի բնակիչների ճնշող մեծամասնությունն աջակցում է Վրաստանի անդամակցությանը ՆԱՏՕ-ին` 79 տոկոս, եւ Եվրամիությանը` 85 տոկոս, վկայում են Միջազգային հանրապետական ինստիտուտի (IRI) սոցիոլոգիական հարցման արդյունքները:
Երկրի բնակչության 52 տոկոսն արեւմտամետ կողմնորոշումն է ընտրում Ռուսաստանի հետ հարաբերությունների պահպանման պայմանով: Մոտ մեկ քառորդը` 22 տոկոս, հայտնում է, որ Վրաստանի քաղաքականությունը պիտի բացառապես արեւմտամետ լինի:
Վրաստանի բնակիչների 59 տոկոսը դրական է գնահատում Վրաստանի գործող կառավարության քաղաքականությունը Ռուսաստանի նկատմամբ: Վրաստանի բնակչության մեկ քառորդին դուր չի գալիս վրացական իշխանությունների մոտեցումը ՌԴ-ի նկատմամբ:
Ռուսաստանի հետ ներկայիս հարաբերությունները հաշվի առնելով, Վրաստանի քաղաքացիների մեծ մասը` 53 տոկոս, իրեն անվտանգ է զգում, վտանգ է զգում բնակիչների 42 տոկոսը:
ՌԴ-ի հետ երկխոսության օգտին հանդես է գալիս Վրաստանի բնակիչների 83 տոկոսը: Միաժամանակ հարցվածների 15 տոկոսը հանդես է գալիս Վրաստանի ռուսամետ քաղաքականության օգտին, հայտնում է «Նովոստի Գրուզիան»:
IRI-ի հետազոտության ընթացքում մարտի 12-ից ապրիլի 2-ը ամբողջ Վրաստանում հարցվել է երկրի 18 տարեկանից մեծ 1500 մշտական բնակիչ: Սխալմունքի հնարավորությունը մոտ 2,5 տոկոս է:
