Արտաքինից ՆԱՏՕ-ն շարունակում է գործել եւ նույնիսկն նախատեսել է ընդլայնվել, սակայն այդ կազմակերպության գոյությունն արդեն վաղուց անիմաստ է դարձել, որովհետեւ իրենք` դաշինքի անդամները նրա դեմ են տրամադրված, գրում է The Week-ը:
Հյուսիսատլանտյան դաշինքը ծանր ժամանակներ է ապրում: Չնայած ԱՄՆ-ն ակտիվորեն դաշնակիցներին քարոզում է մեծացնել պաշտպանության ծախսերը` գոնե մինչեւ ՀՆԱ-ի երկու տոկոսը, նրա կոչերը գնալով ավելի շատ են անտեսվում: 2015-ին Գերմանիան ընդամենը 1,2 տոկոս է ծախսել, Իտալիան` 1 տոկոսից պակաս, իսկ Ֆրանսիան` 1,8 տոկոս, նշում է պարբերականը:
Միաժամանակ ռազմական բյուջեի կրճատումը դաշինքի ամենափոքր խնդիրն է: ՆԱՏՕ-ի համար ավելի սարսափելի խնդիր է այն փաստը, որ Եվրոպան գնալով ավելի շատ է հանդես գալիս համատեղ ինքնապաշտպանության գաղափարին իսկ դեմ, ընդգծում է հոդվածի հեղինակը:
Հետազոտության համաձայն, որ անցկացրել են «Եվրոպայի ապագան» ծրագիրը եւ Հանրային քաղաքականության լեհական ինստիտուտը, Գերմանիայի քաղաքացիների կեսից ավելին դեմ է հանդես գալիս գերմանացի զինվորականներին ՆԱՏՕ-ի այլ երկրների պաշտպանությանն ուղարկելուն, ինչպիսիք են Լեհաստանը եւ Մերձբալթիկայի երկրները: Գերմանացիների միայն 31 տոկոսն է կարծում, որ իրենց երկիրը պիտի կատարի պայմանագրային պարտավորությունները: Հաշվետվության տվյալների համաձայն, նման իրավիճակ է ձեւավորվել ոչ միայն Գերմանիայում: Լեհերին եւ մերձբալթներին պաշտպան կանգնելուն համաձայն չէ նաեւ ֆրանսիացիների եւ իտալացիների կեսը, ասված է հոդվածում:
«Համատեղ ինքնապաշտպանության աքիլեսյան գարշապարն այն է, որ երբ մարդիկ դադարում են հավատալ դրան, այն դադարում է գոյություն ունենալ: Երեւում է` ՆԱՏՕ-ն կրիտիկական կետի է հասել, գրում է Week-ը:
ՆԱՏՕ-ի կառույցները, զորքը եւ դաշինքի ղեկավարությունը դեռեւս գոյություն ունեն, բայց առանց անդամ-պետությունների աջակցության, այն բոլոր խոստումները, որ տալիս են Արեւելյան Եվրոպային, ոչինչ չեն նշանակում: ՆԱՏՕ-ից մնացել է միայն երեւութականությունը, իսկ իրականում դաշինքը հիմնահատակ ավերված է, ընդգծում է պարբերականը:
«Հնարավոր է, որ դաշինքն արդեն ըստ էության մեռած է», — ամփոփում է հոդվածի հեղինակը, հայտնում է «ՌԻԱ Նովոստին»:
