ԱՄՆ-ում Մանհեթենի երկնքում Հայոց ցեղասպանությունը ժխտող գովազդներից, ինչպես նաև՝ Թուրքիան գովաբանող արտահայտություններից հետո «Գայքո» գովազդ տարածող օդանավների ընկերությունն իր կայքում ներողություն է խնդրել հայերից, գովազդային նախադասությունների բովանդակությանը բավականին ուշադրություն չդարձնելու և դրանք երկնքում գրելու համար:
Նշենք, որ ապրիլի 21-ին ամերիկյան մի շարք լրատվամիջոցներ տեղեկացրել էին Մանհեթենի երկնքում հայտնվել էին գրությունները. «Որքան երջանիկ է մարդը, ով կարող է իրեն թուրք կոչել», «Թուրքիան և ճշմարտությունը հավասարազոր են»։
Դրանից անմիջապես հետո Ամերիկայի հայ համայնքը և հայկական կազմակերպություններն արձագանքել են ապատեղեկացնող գրառումներին: «Գայքո» գովազդ տարածող ինքնաթիռների ընկերությանը ուղղվել են բողոքի հազարավոր նամակներ և զանգեր, ինչից հետո ընկերությունը իր կայքում ներողություն էր խնդրել հայերից:
Հիշեցնենք, որ Հայոց ցեղասպանությունը ժխտող մեկ այլ գովազդ էլ տեղադրել էր ամերիկյան հայտնի «Wall Street Journal» օրաթերթը, ինչին անմիջապես արձագանքել էր ամերիկահայ հեռուստաաստղ Քիմ Քարդաշյանը: Նա իր կայքում հոդված էր տեղադրել դատապարտելով Հայոց ցեղասպանությունը ապատեղեկացնող գովազդը և սոցցանցերի բոլոր իր հաշվեհամարներում գրել էր, թե երբ նման անարդարություն է տեսնում, պարզապես չի կարող լռել:
