Ավստրալիայի ագամա մողեսներին ուսումնասիրելու արդյունքում պարզվել է, որ սողունները քնում են գրեթե այնպես, ինչպես կաթնասունները, այդ թվում՝ մարդիկ, այսինքն՝ արագ եւ դանդաղ քնի փուլերի հերթականությամբ: Այս բացահայտումը վկայում է այն մասին, որ համապատասխան մեխանիզմը հայտնվել է դեռ ամենաառաջին չորքոտանի կենդանիների մոտ, որոնք սողունների եւ կաթնասունների նախնիներն են եղել, հայտնում է Planet- today-ը:
«Սողունների մոտ քնի տարբեր փուլեր հայտնաբերելու փորձեր նախկինում էլ են կատարվել, սակայն դրանք տարօրինակ արդյունքներ էին գրանցում: Մենք ամեն դեպքում կարողացել ենք ավստրալական ագամաների մոտ արագ եւ դանդաղ քնի փուլեր նկատել:
Պարզվում է, որ քնի տարբեր փուլեր կան բոլոր սողունների մոտ: Ավելին՝ դրանք եղել են նաեւ դինոզավրերի մոտ: Ըստ երեւույթին, այդ մեխանիզմը ուղեղի համար ավելի կարեւոր է, քան մենք մտածում ենք»,- ասում է Ուղեղի ուսումնասիրության Ֆրանկֆուրտի համալսարանի աշխատակից Ջիլս Լորանը: