Երեւանում 2015թ. հոկտեմբերին վրաերթի ենթարկված՝ գյուղատնտեսության նախարարության ջրային տնտեսության պետական կոմիտեի աշխատակազմի ղեկավար Մհեր Մկրտումյանի կինը՝ Գայանե Մադաթյանը դեռ լիովին չի ապաքինվել, դժվարությամբ է քայլում:
«Տարբեր աստիճանի կոտրվածքներ էի ստացել, գանգուղեղայի վնասվածք: Բժիշկները բոլորը էս աստիճանի ապաքինումը հրաշք են համարում, զարմանում են, որ տեսնում են»,- NEWS.am-ի հետ զրույցում ասաց նա:
Գայանե Մադաթյանը, որ երեք անչափահաս երեխա ունի, կիսով չափ վերադարձել է աշխատանքի:
Նշենք, որ ամուսինները վրաերթի էին ենթարկվել հոկտեմբերի 25-ին: Նրանք գանգուղեղային ծանր վնասվածքներ եւ բազմակի ոսկրային կոտրվածքներ էին ստացել: Հիվանդանոցում օրեր անց Մհեր Մկտրումյանը մահացել էր, կինը մոտ մեկ ամիս անց ապաքինվել, դուրս էր գրվել հիվանդանոցից:
Նրանց վրաերթի ենթարկած տաքսու վարորդին՝ Գեւորգ Գեւորգյանին մեղադրանք է առաջադրվել ՔՕ 242-րդ հոդվածի 2-րդ մասով (Ճանապարհային երթեւեկության եւ տրանսպորտային միջոցների շահագործման կանոնները խախտելը, որն անզգուշությամբ առաջացրել է մարդու մահ) եւ 244-րդ հոդվածով (ճանապարհատրանսպորտային պատահարի վայրը թողնելը):
Ըստ մեղադրանքի՝ Գեւորգ Գեւորգյանը թույլ է տվել խախտում, հանդիպակաց ուղեմասով ընթացող ավտոմեքենաների լույսերից շլացած վիճակում շարունակել է երթեւեկությունը, ժամանակին կատարված արգելակումով չի կանգնեցրել ավտոմեքենան, տեխնիկական տեսակետից ստեղծել է վթարային իրադրություն, որի արդյունքում չի նկատել Վարդանանց փողոցի 69/5 հասցեի դիմացի ճանապարհահատվածով` իր երթեւեկության նկատմամբ աջից դեպի ձախ փողոցը հատող հետիոտներ Մհեր Մկրտումյանին եւ Գայանե Մադաթյանին, վրաերթի է ենթարկել նրանց:
Գեւորգ Գեւորգյանն իրեն առաջադրված մեղադրանքը չի ընդունում՝ պնդելով, որ ինքը չի նկատել ամուսիններին, նրանք փողոցը հատել են անթույլատրելի հատվածով: