Դանիայի իշխանությունները որոշել են մինչեւ հունիսի 2-ը երկարացնել Գերմանիայի հետ սահմանին ժամանակավոր հսկողության ժամկետը, հայտնել է «Ռոյթեր» գործակալությունը՝ վկայակոչելով միգրացիայի ու ինտեգրման հարցերով նախարարության հայտարարությունը:
Դանիայի կառավարությունը, հետեւելով Շվեդիայի օրինակին, Գերմանիայի հետ սահմանին առաջին անգամ ժամանակավոր հսկողություն էր սահմանել հունվարի 4-ին՝ որպեսզի պայքարի երկրում միգրացիոն ճգնաժամի դեմ, հայտնում է «ՌԻԱ Նովոստին»:
Իշխանություններն անհրաժեշտ են համարում սահմանների հսկողությունը եւս 30 օրով երկարացնելը, հաշվի առնելով որ մեծ քանակությամբ ապօրինի ներգաղթյալներ կարող են հայտնվել Դանիայի տարածքում, ասվում է նախարարության հայտարարության մեջ:
Ապրիլի սկզբին Դանիան մինչեւ մայիսի 3-ը երկարացրել էր սահմաններին ժամանակավոր հսկողության ռեժիմը:
ԵՄ Frontex գործակալության տվյալներով 2015-ին Եվրամիություն է ժամանել 1.8 մլն միգրանտ: Եվրահանձնաժողովը հայտարարել է, որ սա խոշորագույն միգրացիոն ճգնաժամն է Երկրորդ համաշխարհային պատերազմի ժամանակներից ի վեր: Եվրահանձնաժողովը նախազգուշացրել է հումանիտար ճգնաժամի սպառնալիքի մասին:
