Տղամարդը պետք է ծառայի բանակում, առավել եւս հիմա, որ պիտի այլ ռեժիմով ապրենք: Այս մասին NEWS.am-ի հետ զրույցում ասաց ՀՀԿ խմբակցության պատգամավոր Կարինե Աճեմյանն՝ անդրադառնալով «Զինապարտության մասին օրենքում» փոփոխություններ կատարելուն, որ 18 տարին լրանալուց հետո բոլոր տղաները պետք է անխտիր ծառայեն:
«Ինքս միշտ համարել եմ, որ տղամարդը պետք է ծառայի բանակում: Օրինագիծը դեռ չեմ տեսել, ծանոթ չեմ, երբ գա Ազգային ժողով, մենք ծանոթանանք, այդ ժամանակ կարելի է տեսակետ ասել: Պարզ է, որ դա կապված է վերջին իրադարձությունների հետ: Մենք հիմա պիտի այլ ռեժիմով աշխատենք, ապրենք, ամեն ինչ պետք է նայել այս կոնտեքստում»,-ասաց Կարինե Աճեմյանը:
Ըստ պատգամավորի՝ այս օրենքի ընդունումը կարող է լինել սոցիալական արդարությունը վերականգնելու կետերից մեկը:
«Առհասարակ, սոցիալական արդարությունը վերականգնելու կետերից մեկը կարող է դա լինել... Յուրաքանչյուր օրինագիծ լուրջ քննարկումների էտապ է անցնում եւ այդ քննարկումների ժամանակ շատ բան է ի հայտ գալիս, չեմ բացառում, որ այլ ձեւով կլընդունվի օրինագիծը կամ չանցնի: Այսինքն, ինքս դեռ տեղյակ չեմ ՝ ինչի մասին է խոսքը, ու իմ տեսակետը այն է, որ բոլոր տղամարդիկ պիտի ծառայեն: Իսկ թե ինչ տեսքով կընդունվի ու որոնք են բացասական ու դրական կողմերը, հայտնի կլինի քննարկումների ժամանակ»:
Հիշեցնենք որ «Զինապարտության մասին օրենքում» փոփոխություններ կատարելու մասին նախագիծ է մշակվել, որով նախատեսվում է բացառությամբ որոշակի դեպքերի, առանց տարկետման բանակ զորակոչել 18 տարին լրացած տղաներին: Օրինագծի ներկայացրել են ԱԺ պատգամավոր Ռուբեն Հակոբյանն ու «Ժառանգություն» խմբակցությունից Թեւան Պողոսյանը։