Կարելի է ենթադրել, որ Եվրոպան Թուրքիայի հետ գործարք է կնքել քրդական հարցի վերաբերյալ: Այդ մասին ֆրանսիական խորհրդարանական «Public Senat» հեռուստաալիքի եթերում հայտնել է ֆրանսիացի պատմաբան, Թուրքիայում Ֆրանսիական ինստիտուտի նախկին աշխատակից Էտյեն Կոպոն:
Նրա խոսքով, Եվրամիության հետ բանակցությունների ընթացքում քրդերի նկատմամբ ճնշումն ուժեղացել է: Այստեղ կարելի է առեւտրի տարր նկատել` «դուք աչք եք փակում քրդերի վրա, իսկ մենք հետ կվերցնենք ձեր էմիգրանտներին» սկզբունքով: «Պարզ է, որ նման մի բան է տեղի ունենում, որովհետեւ Եվրոպան լիակատար լռություն է պահպանում կամ էլ համարյա լռում է այն մասին, ինչ տեղի է ունենում Թուրքիայի արեւելքում», - նկատել է Կոպոն: «Քրդերի դեմ պայքարը, որը վարում են 1925 թվականից, մեկն է այն գործոններից, որոնք ամրապնդում են թուրքական հասարակությունը: Երկրորդը (բայց նշանակությամբ` առաջինը) ազգայնականությունն է: Ընդ որում, այն գոյություն ունի ոչ թե գաղափարի իրավունքով, այլ բացարձակ սկզբունքի: Պարտադիր է ազգայնական լինելը: Դա գովելի հատկանիշ է համարվում: Այն քարոզում են դպրոցում, բանակում: Հետաքրքիրն այն է, որ Աթաթուրքի պաշտամունքը, որպես այդպիսին, սկսել է ձեւավորվել 1980-ի ռազմական հեղաշրջումից հետո միայն: Դեռեւս 1970-ականներից սկսել է տարածվել XX դարի սկզբին ծնունդ առած այն գաղափարը, թե Թուրքիայի յուրաքանչյուր բնակիչ պիտի անպայման մահմեդական լինի: Այսինքն մի կողմից քարոզվում է Աթաթուրքի կերպարը, որպես թուրքական աշխարհիկ պետության հիմնադրի, մյուս կողմից` բոլոր ուժերով քշում են ոչ մահմեդականներին, այդ թվում` հայերին եւ հույներին», - ասել է պատմաբանը: