16-ամյա Խաչիկ Ղազանչյանի սպանության մեջ մեղադրվող Սուրեն Մուրադյանին դեպքից մեկ ժամ առաջ Խաչիկն ու ընկերները զանգել, հայհոյել են, գումար են պահանջել: NEWS.am-ի հետ զրույցում նման պնդում արեց Սուրեն Մուրադյանի մորեղբայրը՝ Բաբկեն Շահինյանը՝ նշելով, որ այդ ամենը ապացուցվել է նախաքննության ընթացքում՝ հեռախոսային վերծանումներից:
«Զանգել, ասել են՝ նվեր բեր, եթե չէ, փողը բեր: Խաչիկը ստոր հայհոյանքներ է տվել ընտանիքին, ծնողին վերաբերող: 5 անգամ զանգել է ուրիշի համարից, հետո իր համարից, հետո փակ համարով է զանգել, որ հետո պարզվել է՝ ընկերներից մեկինն է»,- պատմեց Բաբկեն Շահինյանը:
Սուրենի մորեղբոր խոսքով՝ դրանից հետո Խաչիկն ուզել է հաշվեհարդար տեսնել Սուրենի հետ, քանի որ նա հրաժարվել է գումար տալ:
«Սուրենը գնում ա՝ ճշտի՝ ինչ է կատարվում: Քայլում են, Խաչիկը հանում ա գրպանից դանակը, Սուրենը խլում ա, Խաչիկը խփում ա դեմքին: Հետո Սուրենը հիշում ա, որ տեսել ա՝ Խաչիկը գետնին ա»,- պատմեց նա:
Մորեղբոր խոսքով՝ Սուրենը դրանից հետո վախեցած է եղել, փախչել է, իսկ օրեր առաջ անձամբ է ներկայացել ոստիկանություն:
Բաբկեն Շահինյանը պնդեց, որ այն վարկածը, թե Խաչիկը շնորհավորել է Սուրենի Սուրբ Ծնունդը, ինչից նա վրդովվել է եւ դանակով հանկարծակի հարվածներ է հասցրել Խաչիկին, իրկանությանը չեն համապատասխանում:
«Սուրենն ունի քավոր, քրիստոնեապաշտ անձնավորություն է, մնացածը հերյուրանքներ են նրա մասին»,- ասաց նա:
Նշենք, որ Խաչիկն ու Սուրենը մանկության ընկերներ են եղել:
Սպանության գործը դատարանում է:
Խաչիկին դանակի 14 հարվածով սպանելու մեջ մեղադրվող՝ նրա 18-ամյա ընկեր Սուրեն Մուրադյանին մեղադրանք է առաջադրվել այն բանի համար, որ նա 2016թ. հունվարի 6-ին, կենցաղային հարցերի շուրջ ծագած վիճաբանության ընթացքում Խաչիկ Ղազանչյանին սպանելու դիտավորությամբ իր մոտ եղած սուր կտրող-ծակող առարկայով բազմաթիվ հարվածներ է հասցրել նրա մարմնի տարբեր կենսական կարեւոր նշանակություն ունեցող մասերին` պատճառելով կյանքին վտանգ սպառնացող ծանր մարմնական վնասվածքներ, որոնցից նա դեպքից մոտ մեկ ամիս անց մահացել է: