Մայիսի 4-ին աշխատանքային այցով Պրահա ժամանած ԱԳ նախարար Էդվարդ Նալբանդյանը հանդիպեց Չեխիայի արտգործնախարար Լյուբոմիր Զաորալեկին:

Զրուցակիցները բարձր գնահատեցին երկու երկրների միջեւ հաստատված արդյունավետ փոխգործակցությունը, անդրադարձան Չեխիայի Նախագահի՝ Հայաստան կատարելիք այցելության նախապատրաստական աշխատանքներին, անցյալ շաբաթ Պրահայում կայացած միջկառավարական հանձնաժողովի նիստի արդյունքներին: Հայաստանի եւ Չեխիայի արտաքին քաղաքական գերատեսչությունների ղեկավարները գոհունակություն արտահայտեցին իրենց ղեկավարած երկու գերատեսչությունների միջեւ պարբերական խորհրդատվությունների կապակցությամբ։

Հայաստանի արտգործնախարարը իր չեխ գործընկերոջը ներկայացրեց այս տարվա ապրիլի սկզբին Ադրբեջանի կողմից Լեռնային Ղարաբաղի դեմ սանձազերծված ագրեսիվ ռազմական գործողությունների հետեւանքները՝ ընդգծելով, որ Ադրբեջանը շարունակում է արհամարհել հրադադարը հարգելու մասին միջազգային հանրության բազմաթիվ կոչերը, ոտնահարել 1994-1995թթ. զինադադարի հաստատման եւ ամրապնդման մասին եռակողմ անժամկետ համաձայնագրերը:

Նախարար Նալբանդյանը վերահաստատեց, որ Հայաստանը շարունակելու է համանախագահ երկրների հետ միասին աշխատել՝ Լեռնային Ղարաբաղի հակամարտության բացառապես խաղաղ կարգավորմանը հասնելու համար։ Հայաստանի արտաքին քաղաքական գերատեսչության ղեկավարը հավելեց, որ բանակցությունների վերսկսման համար անհրաժեշտ պայմաններ ձեւավորելու նպատակով հարկավոր է երաշխավորել 1994 եւ 1995թթ. զինադադարի եռակողմ անժամկետ համաձայնագրերի անվերապահ կատարումը եւ կյանքի կոչել համանախագահների առաջարկը` միջադեպերի հետաքննության մեխանիզմի ներդրման վերաբերյալ:

Լյուբոմիր Զաորալեկը շեշտեց, որ ղարաբաղյան հիմնախնդիրը կարող է լուծվել միայն խաղաղ ճանապարհով՝ ԵԱՀԿ Մինսկի խմբի համանախագահների միջնորդությամբ ընթացող բանակցային գործընթացի շրջանակներում։

Զրուցակիցները մտքեր փոխանակեցին Հայաստան-Եվրոպական միություն հարաբերությունների շուրջ։