Ազգությամբ եզդի գործարար, բարերար Ջնդի Ամարյանին ազատ արձակելու պահանջով այսօր՝ մայիսի 5-ին, եզդիական համայնքի մի քանի տասնյակ ներկայացուցիչներ գրավոր դիմումներ ներկայացրին նախագահական նստավայր, Կառավարություն եւ Գլխավոր դատախազություն:
«Մենք պահանջում ենք, որ մեր բարերարին ազատ արձակեն: Նրան չգիտես՝ ինչու ապրիլի 1-ից բանտարկել են «Նուբարաշենում»: Այսօր ժողովուրդը ոտքի է կանգնել եւ պահանջում է, որ նրան ազատ արձակեն: Պահանջում ենք արդարադատություն»,- NEWS.am-ի հետ զրույցում ասաց շեյխ Տոսուն:
Եզդիական համայնքի ներկայացուցիչները մի շենքից մյուսը հասան երթով, վանկարկելով՝ «Ազատություն Ջնդիին¦: Նրանք սկզբում եղան Նախագահական նստավայրի մոտ, ապա Կառավարության շենքի, որտեղից էլ շարժվեցին Գլխավոր դատախազություն:
Նշենք, որ ակցիային մանսակցում է նաեւ Արցախյան պատերզմում զոհված Քյարամ Սլոյանի հայրը:
Հիշեցնենք, որ Ջնդի Մահմադի Ամարյանին մեղադրանք է առաջադրվել ՀՀ քրեական օրենսգրքի 182-րդ հոդվածի 3-րդ մասի 2-րդ կետով (շորթում), եւ 02.04.2016 թվականից նա գտնվում է անազատության մեջ:
