ՀՀ նախագահ Սերժ Սարգսյանն այսօր ընդունել է Հայաստանի Հանրապետությունում Հնդկաստանի Հանրապետության արտակարգ եւ լիազոր դեսպան Սուրեշ Բաբուին, ով ավարտում է իր դիվանագիտական առաքելությունը մեր երկրում:
Նախագահի մամուլի գրասենյակից NEWS.am-ին հայտնում են, որ նախագահը շնորհակալություն է հայտնել դեսպան Բաբուին պաշտոնավարման անցած երեք տարիներին ակտիվ եւ արդյունավետ աշխատանքի համար՝ բարձր գնահատելով Հնդկաստանի հետ Հայաստանի հարաբերությունների ամրապնդման ու զարգացման գործում դեսպանի ներդրումը:
Զրուցակիցները երկուստեք գոհունակությամբ են նշել, որ վերջին տարիներին ընդլայնվել եւ հարստացել է հայ-հնդկական երկկողմ համագործակցության օրակարգը՝ ներառելով փոխադարձ հետաքրքրություն ներկայացնող բազմաթիվ ոլորտներ, նաեւ առկա մեծ ներուժը հաշվի առնելով, նախանշվել են փոխգործակցության հեռանկարային նոր ուղղություններ, որոնք զարգացնելու համար երկկողմ աշխատանք է իրականացվում: ՀՀ Նախագահը եւ դեսպան Բաբուն կարեւորել են միջկառավարական եւ միջխորհրդարանական մակարդակներով տեղի ունեցող արդյունավետ շփումները, միջազգային կազմակերպությունների շրջանակներում երկու երկրների համագործակցությունը: Հանրապետության նախագահը շնորհակալություն է հայտնել Հնդկաստանի կառավարությանը՝ Հայաստանի համար զգայուն հարցերի վերաբերյալ մշտապես հավասարակշռված դիրքորոշում արտահայտելու համար:
Դեսպան Սուրեշ Բաբուն կարեւորել է ԵՏՄ անդամ Հայաստանի հետ այդ կազմակերպության շրջանակներում եւս համագործակցության զարգացումը՝ նկատի առնելով, որ Հնդկաստանը շահագրգռված է ԵՏՄ հետ ազատ առեւտրի գոտի ստեղծելու հարցում, եւ այդ ուղղությամբ աշխատանքներն ընթացքի մեջ են:
Հանրապետության Նախագահը Սուրեշ Բաբուին մաղթել է հաջողություններ հետագա գործունեության ընթացքում եւ հույս հայտնել, որ մեր երկրում Հնդկաստանի հաջորդ դեսպանը նույնպիսի եռանդով ու նվիրվածությամբ կկատարի իր դիվանագիտական առաքելությունը:
Դեսպան Սուրեշ Բաբուն շնորհակալություն է հայտնել Նախագահ Սերժ Սարգսյանին իր աշխատանքին տրված բարձր գնահատականի եւ պաշտոնավարման տարիներին սերտ համագործակցության ու աջակցության համար: