Երեւան քաղաքի քննչական վարչության Կենտրոն եւ Նորք Մարաշ վարչական շրջանների քննչական բաժնում քննվող քրեական գործով միջոցներ են ձեռնարկվում՝ պարզելու համակարգչային խանութից գողություն կատարած անձանց ինքնությունը։
2016 թվականի ապրիլի 5-ին՝ ժամը 04:50-ի սահմաններում, առերեւույթ հանցագործություն կատարած անձինք, քարով կոտրելով Երեւան քաղաքի Նալբանդյան փողոցում գտնվող համակարգչային խանութի մուտքի դռան ապակին, ապօրինի մուտք են գործել խանութի սրահ եւ հափշտակել 5 դյուրակիր համակարգիչ, 1 բարձրացուցիչ եւ 1 «Apple TV»՝ պատճառելով առանձնապես խոշոր չափի վնաս:
Դեպքի առթիվ Երեւան քաղաքի Կենտրոն եւ Նորք Մարաշ վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 177-րդ հոդվածի 3-րդ մասի 1-ին կետի հատկանիշներով:
Նախաքննության ընթացքում ստացվել են խանութի սրահում տեղադրված տեսախցիկների՝ տվյալ օրվա տեսագրությունները, որոնցում արձանագրված է գողության դրվագը. Կադրերում երեւում է երկու տղամարդ, ովքեր քարով հարվածելով կոտրել են խանութի մուտքի դռան ապակին եւ սրահից հափշտակել տարբեր առարկաներ:
Քրեական գործով բազմակողմանի, օբյեկտիվ եւ լրիվ նախաքննության իրականացումն ապահովելու համար միջոցներ են ձեռնարկվում՝ տեսագրության մեջ պատկերված անձանց ինքնությունը պարզելու, նրանց հայտնաբերելու ուղղությամբ։
Ովքեր որեւէ տեղեկություն ունեն նրանց ինքնության կամ գտնվելու վայրի մասին, խնդրում են հայտնել ՀՀ քննչական կոմիտեի Երեւան քաղաքի քննչական վարչության Կենտրոն եւ Նորք Մարաշ վարչական շրջանների քննչական բաժին կամ ոստիկանության մոտակա բաժին:
