Թուրքիայի վարչապետ Ահմեդ Դավութօղլուի հեռացումով Թուրքիան ավելի անկանխատեսելի է դառնալու, քանի որ երկիրը միանձնյա ղեկավարելու է Էրդողանը։ Այս մասին, այսօր՝ մայիսի 6-ին, լրագրողների հետ հանդիպմանը հայտարարեց թուրքագետ Անդրանիկ Իսպիրյանը։

Թուրքագետի խոսքով՝ Թուրքիայի վարչապետ Ահմեդ Դավութօղլուի հեռանալով ավարտվեց հայ-թուրքական հարաբերությունների կարգավորման տխրահռչակ փորձը։

«Հայ-թուրքական հարաբերությունների կարգավորման «ճարտարապետը» հենց Դավութօղլուն էր։ Նա այդ ամենը համակարգում էր դեռ վարչապետի՝ արտաքին հարցերով խորհրդական եղած ժամանակ։ Իսկ 7 տարի առաջ այս օրերին նշանակվեց ԱԳ նախարար եւ հայկական կողմի հետ պատրաստեցին հայտնի արձանագրությունները, որոնք Դավութօղլուի հեռանալուց հետո արեւէ արժեք չունեն»,-նշեց Իսպիրյանը՝ հավելելով, որ ի տարբերություն Էրդողանի, Դավութօղլուն բավականին կրթված ու հավասակշիռ քաղաքական գործիչ է։