ՀՀ քննչական կոմիտեի Երեւանի քննչական վարչության Աջափնյակ եւ Դավթաշեն վարչական շրջանների քննչական բաժնում ավարտվել է ոստիկանության աշխատակիցների նկատմամբ բռնություն գործադրելու դեպքի առթիվ հարուցված քրեական գործի նախաքննությունը:
ՀՀ Քննչական կոմիտեից NEWS.am-ին հայտնում են, որ նախաքննությամբ ձեռք բերված ապացույցների համաձայն՝ ճանապարհային ոստիկանության տեսուչներ Գ.Մովսիսյանը եւ Գ.Կարապետյանը, 2016 թվականի փետրվարի 20-ին Աջափնյակ եւ Դավթաշեն վարչական շրջանում ծառայություն իրականացնելիս, Բաշինջաղյան փողոցում նկատել են, որ «Ռենո» մակնիշի ավտոմեքենան թույլ է տվել ճանապարհային երթեւեկության կանոնների խախտում՝ պահանջելով կանգնեցնել այն։
«Ռենո» մակնիշի ավտոմեքենայի վարորդն ու ուղեւորը անհամաձայնություն են հայտնել՝ իրավախախտման համար ճանապարհային ոստիկանության աշխատակիցների կազմած արձանագրության կապակցությամբ, վիճաբանել, քաշքշել եւ մարմնական վնասվածքներ հասցրել վերջիններիս։
Ձեռք բերված ապացույցների համակցությամբ՝ ավտոմեքենայի վարորդին եւ ուղեւորին մեղադրանք է առաջադրվել՝ ՀՀ քրեական օրենսգրքի 316-րդ հոդվածի 1-ին մասով (Իշխանության ներկայացուցչի նկատմամբ կյանքի կամ առողջության համար ոչ վտանգավոր բռնություն գործադրելը կամ բռնություն գործադրելու սպառնալիքը՝ կապված նրա կողմից իր ծառայողական պարտականությունները կատարելու հետ):
Քրեական գործը՝ մեղադրական եզրակացությամբ, ուղարկվել է նախաքննության օրինականության նկատմամբ հսկողություն իրականացնող դատախազին: