Արմավիրի մարզի Ակնաշեն գյուղի գերեզմանատան ճանապարհին գտնվող ջրանցքում մահացած հայտնաբերված 50-ամյա Վաչիկ Բուդաղյանը Ակնաշեն գյուղի բնակիչ էր: NEWS.am-ի հետ զրույցում Ակնաշենի գյուղապետ Միսակ Միսակյանը նշեց, որ 50-ամյա տղամարդը հոգեկան շեղումներ է ունեցել, գյուղում բնակվել է միայնակ: Նրա հարազատները բնակվում են Ռուսաստանի Դաշնությունում, իսկ ինքը երկու անգամ ամուսնացած է եղել, սակայն բաժանվել է՝ հիվանդության պատճառով:
«Ինքը հաճախ էր մոր գերեզմանին գնում, կարծում ենք, որ դեպքը լուսադեմին է եղել, գնացել է գերեզմաններ ու ընկել է ջրանցքը: Որովհետեւ, երբ հայտնաբերեցինք, դիակը հանեցինք դեռ սառած չէր: Ինքնասպանությունը բացառվում է, կարծում եմ, պատահաբար է ընկել, բռնության հետքեր չեն հայտնաբերել»,-ասաց գյուղապետը:
Ավելի վաղ NEWS.am-ը տեղեկացրել էր, որ այսօր՝ մայիսի 6-ին, վաղ առավոտյան Ակնաշենի ջրանցքում հայտնաբերվել է քաղաքացու դի: