Ռուսաստանը եւ Կատարն առաջիկա բանակցությունների ընթացքում մտքեր կփոխանակեն նավթի շուկայում իրավիճակի վերաբերյալ, սակայն չարժե սպասել նավթի արդյունահանման սառեցման պայմանավորվածության: Այդ մասին հայտնել է Ռուսաստանի նախագահի մամուլի քարտուղար Դմիտրի Պեսկովը, հայտնում է «ՌԻԱ Նովոստին»:
«Հազիվ թե արժե պայմանավորվածություններ սպասել այդ առումով, որովհետեւ անկասկած Ռուսաստանը եւ Կատարը չեն կարող երկուսով նման համաձայնություն ձեռք բերել: Մենք գիտենք, դա շատ բարդ համատեղ գործընթաց է: Իսկ անհաջողությունից հետո, որը վերջերս արձանագրվել էր այդ գործընթացում, այսպես ասենք, շատ բան անհրաժեշտ է սկզբից սկսել», — ասել է նա:
«Ռուսաստանի ներկայացուցիչները, մասնավորապես` էներգետիկայի եւ գիտության նախարարներն այս դեպքում բազմիցս ընդգծել են, որ այս պահին գնդակը մեր կողմում չէ, այլ մեր գործընկերների` այս գործում հայտնի գործընկերների», — ասել է Պեսկովը` նշելով, որ էներգակիրների գնային կոնյուկտուրայի վերաբերյալ կարծիքների փոխանակում հնարավոր է: Բացի այդ, նրա խոսքով, ակնկալվում է, որ այն բանից հետո, երբ նախարարները կայցելեն նախագահին, արտգործնախարար Սերգեյ Լավրովը հանդես կգա համապատասխան պարզաբանումներով:
Ապրիլի կեսին Դոհայում տեղի ունեցան նավթ արտահանող խոշորագույն երկրների բանակցություններ: Ակնկալվում էր, որ դրանց արդյունքում կհայտարարվի նավթի արդյունահանումը 2016-ի հունվարի մակարդակում սառեցնելու մասին, սակայն դա տեղի չունեցավ: Էներգետիկայի նախարար Ալեքսանդր Նովակի խոսքով, Դոհայում հանդիպումից առաջ ՕՊԵԿ-ի մի շարք երկրներ փոխել են իրենց դիրքորոշումը եւ լրացուցիչ պահանջներ են առաջ քաշել:
Հետագայում Իրաքի իշխանությունները հայտնեցին, որ ՕՊԵԿ-ի անդամների եւ այլ նավթ արդյունահանողների նոր հանդիպումը, որտեղ կքննարկվի սառեցումը, կարող է տեղի ունենալ Ռուսաստանում` մայիսին:
Մի քանի օր առաջ, մայիսի 4-ին Bloomberg-ը` վկայակոչելով ՕՊԵԿ-ի վեց աղբյուրների, հայտնել է, որ ՕՊԵԿ-ի անդամները դադարել են քննարկել նավթի արդյունահանման սառեցման տարբերակներ, որովհետեւ շուկայում ընթացիկ փոփոխությունները նման քննարկումներն անիմաստ են դարձնում:
Այժմ Brent ապրանքանիշի նավթը վաճառվում է մեկ բարելի դիմաց 44,9 դոլարի մակարդակում:
