Այս կամ այն երկրի՝ ԵՏՄ-ին միանալու որոշումը կազմակերպության անդամները կայացնելու են կոնսենսուսով։ Այս մասին Մոսկվայում հայ լրագրողների հետ հանդիպմանն ասել է ԵՏՀ Կոլեգիայի անդամ, ինտեգրացիայի եւ մակրոտնտեսական քաղաքականության հարցերով նախարար Տատյանա Վալովայա՝ անդրադառնալով հարցին, թե ինչպես է նա գնահատում ԵՏՄ-ին Ադրբեջանի միանալու կարեւորության մասին ռուսաստանցի պաշտոնյաների հայտարարությունները։
Վալովայայի խոսքով՝ Ռուսաստանի, Ղազախստանի եւ Բելառուսի ներկայացուցիչները կարող են հայտարարել, որ այս կամ այն պետությունը կարող է ԵՏՄ անդամ լինել։ Եվ ոչ ոք Հայաստանին չի արգելի ասել, որ վատ չէր լինի, եթե Իրանը ԵՏՄ անդամ դառնար։ «Չարժե հուզականորեն հայտարարել, թե Ադրբեջանը չպետք է ԵՏՄ անդամ դառնա։ Հայաստանի եւ Ադրբեջանի միջեւ հակամարտությունը վաղ թե ուշ կլուծվի, եւ կարող են նոր հնարավորություններ բացվել։ ԵՏՄ անդամ ցանկացած երկիր կարող է դիրքորոշում հայտնել այն պետության նկատմամբ, որի հետ ինքը նորմալ առեւտրա-տնտեսական հարաբերություններ է զարգացնում։ Բայց դա չի նշանակում, որ ինչ-որ մեկը մյուսին ճնշելու է այս կամ այն հարցի շուրջ»,- նշել է Վալովայան՝ միաժամանակ ընդգծելով, որ ԵՏՄ-ն Միության ընդլայնման հարցով բանակցություններ չի վարում։