Լոռու մարզի Շնող գյուղում մայիսի 18-ի գիշերը, իր տունը հրդեհած հոգեկան շեղումներ ունեցող 33-ամյա տղամարդը պատմել է, որ տան հրդեհն առաջացել է անկողինը վառելուց հետո: NEWS.am-ի հետ զրույցում Շնողի գյուղապետ Հովիկ Սահակյանը նշեց, որ 33-այա տղամարդը պատմել է, որ որոշել է անկողինը վառել, որովհետեւ անկողնուց հոտ է եկել:
«Ասում ա, որ անկողնուց հոտ է եկել՝ վառել է, հետո կողքի սենյակ է գնացել, որ մաքուր անկողին բերի՝ տեսել է, վառվում ա, գցել ա հատակին ու տունն է սկսել վառվել»,-ասաց գյուղապետը:
Նշենք, որ հոգեկան շեղումներ ունեցող տղամարդը տանը ապրել է իր եղբոր հետ, որն այդ պահին իրենց խանութում աշխատանքի է եղել:
Ավելի վաղ տեղեկացրել էինք, որ մայիսի 18-ին, ժամը 03.48-ին ահազանգ է ստացվել, որ հրդեհ է բռնկվել Լոռու մարզի Շնող գյուղի տներից մեկում: Հրդեհը մեկուսացվել է ժամը 06.00-ին, մարվել՝ 08.02-ին: Տունն ամբողջությամբ (100 քմ) այրվել է (բացի ննջասենյակից՝ 30 քմ):
