Հայաստանում վերջին տասնամյակում բարեփոխումներ են իրականացվել, որոնք հնարավորություն են տալիս երկրում խոշոր ներդրումներ անել։ Այս մասին մայիսի 18-ին՝ ԱՄՆ-Հայաստան բիզնես կոնֆերանսի շրջանակներում լրագրողների հետ զրույցում, ասաց Հայաստանում ԱՄՆ դեսպան Ռիչարդ Միլսը։
Դեսպանի խոսքով՝ բարեփոխումներ են իրականացվել հարկային եւ մաքսային ոլորտներում, մտավոր ունեցվածքի իրավունքի ոլորտում։ «Այս բիզնես կոնֆերանսի նպատակն է Հայաստանում գործող հնարավորությունները ներկայացնել Երեւան հրավիրված ամերիկյան ընկերություններին, որոնք հետխորհրդային տարածքում գործունեության մեծ փորձ ունեն»,- նշել է Միլսը։
Դեսպանը հավելել է, որ այդ ընկերությունները ներկայացնում են տարբեր ոլորտներ՝ սպառողական ապրանքներ, իժեներություն, տեղեկատվական տեխնոլոգիաներ։ «Ես միշտ ասել եմ, որ այն ամերիկյան ընկերությունների համար, որոնք այստեղ են գալիս պատրաստված եւ որոնք ուզում են համապատասխան գործունեություն իրականացնել, միշտ հնարավորություններ կան»,- ընդգծել է Ռիչարդ Միլսը։