Տուլայում 2015թ. նոյեմբերի 3-ին հայկական ավտոբուսի վթարի գործով դատաքննությունը մայիսի 18-ից սկսվել է:
Դատական առաջին նիստին տուժողներից եւ նրանց ներկայացուցիչներից ոչ ոք չի ներկայացել, ինչպես նաեւ վկաները:
«Այդ պատճառով սկսեցինք գործի նյութերի ուսումնասիրությունը: Մենք հայտարարեցինք, որ նախաքննության մարմինը քննության ժամանակ մեզ խոչընդոտել է իրականությունը պարզելուն, քանի որ վթարի պատճառը տեխնիկական է եղել, այսինքն գործարանային թերություն է ունեցել, մինչդեռ նախաքննական մարմինը մեզ չի օգնել՝ պարզելու այդ հանգամանքները»,- NEWS.am-ի թղթակցին ասաց ամբաստանյալ, ավտոբուսի վարորդ Գառնիկ Հարությունյանի փաստաբան Կարեն Ներսիսյանը:
Փաստաբանի խոսքով՝ իր պաշտպանյալը դատարանում հայտարարել է, որ իրեն կատեգորիկ մեղավոր չի ճանաչում եւ պահանջում է դատարանից նշանակել նոր փորձաքննություն, բայց ոչ նույն փորձագիտական կենտրոններում: Դատական նիստը հետաձգվեց եւ նշանակվեց մայիսի 20-ին: Նշենք, որ տուժողներից ոչ մեկը քաղաքացիական հայց չի ներկայացրել։
Նշենք, որ ըստ ռուսական կողմի՝ վթարի պատճառը եղել է արագությունը գերազանցելը:
Հիշեցնենք, որ Տուլայի մարզում ողբերգական վթարը տեղի էր ունեցել 2015թ. նոյեմբերի 3-ին: Վթարից զոհվել է 9 մարդ։ Վթարի առնչությամբ հարուցվել է քրեական գործ «ճանապարհային երթեւեկության կանոնները եւ փոխադրամիջոցի շահագործման կանոնները խախտելու» հոդվածով։ Ավտոբուսի վարորդ Գառնիկ Հարությունյանը կալանավորված է։
Ավտոբուսը պատկանում էր «Քինգ Դելյուքս»-ին: Ի սկզբանե վարկածներ էին շրջանառվում, որ վարորդը կամ արագությունն է գերազանցել, կամ բջջային հեռախոսով է խոսել:
