Որեւէ մեկը չի կարող լռեցնել Արցախի ժողովրդի ձայնը։ Այդ մասին այսօր՝ մայիսի 19-ին ՀՀԿ ԳՄ նիստից հետո լրագրողների հետ զրույցում նշել է ԱԺ փոխնախագահ, ՀՀԿ մամուլի քարտուղար Էդուարդ Շարմազանովը։
Նա նշել է, որ նիստում քննարկվել են ներքաղաքական հարցեր՝ կապված Ընտրական օրենսգրքի հետ, նաեւ քննարկել են նախագահի՝ Վիեննա կատարած այցի արդյունքները։
Ըստ Շարմազանովի, Վիեննայում որեւէ նոր փաստաթուղթ չի քննարկվել։ «Մայիսի սկզբին եւ Ֆրանսիայի ԱԳՆ-ն, եւ Պետդեպն ու ՌԴ ԱԳՆ-ն հստակ խոսել են, որ Արցախի ժողովրդի կամարտահայտությունն է հիմնական, անկյունաքարային սկզբունքներից մեկը։ Խնդիրը պետք է լուծվի երեք սկզբունքների վրա. Քննարկումը Վիեննայում եղել է հետաքննությունների մեխանիզմների ներդրման, հրադադարի ռեժիմի պահպանման հարցերի վերաբերյալ»,- նշել է Շարմազանովը։
«Խնդիրը պետք է համապարփակ լուծվի, որեւէ մեկը չի կարող լռեցնել Արցախի ժողովրդի անկախության ձայնը»,- ասել է նա։