Իշխանությունների այն հայտարարությունները, որ Հայաստանում մենաշնորհներ չկան միայն մեկ դեպքում ճիշտ կլինեն՝ եթե երկրում նվազեն լայն սպառման ապրանքների գները: Այս մասին մայիսի 20-ին ԱԺ ավանդական ճեպազրույցներում հայտնել է ՀԱԿ ազգային խմբակցության ղեկավար Լեւոն Զուրաբյանը՝ մեկնաբանելով վարչապետ Հովիկ Աբրահամյանի վերջին ելույթը:
Ընդդիմադրի խոսքով իշխանությունները հայտարարել են, որ բոլոր ցանկացողները կարող են առեւտրով զբաղվել: Բայց այդ խոստումները պետք չէ չափել «հավատում եմ՝ չեմ հավատում» սկզբունքով: «Կա եւս մեկ օբյեկտիվ ցուցանիշ՝ եթե մենաշնորհներ այլեւս չկան, գները պետք է նվազեն ու երկարաժամկետ: ՀԱԿ-ը մինչ այդ հայտարարել էր, որ լայն սպառման ապրանքների գները կարելի է միանգամից 25-30 տոկոսով նվազեցնել: Մենք արդեն համապատասխան ծրագիրը ներկայացնում ենք ու չենք հրաժարվում մեր բառերից»,- նշել է Զուրաբյանը: