Վերջին տարիներին Արցախի տնտեսության մեջ բանկային կապիտալի կայուն ներգրավում է արձանագրվել: Այս մասին, մայիսի 20-ին, Շուշիում ՀՀ-ում գործող մի շարք բանկերի ղեկավարների հետ հանդիպման ժամանակ նշել է Արցախի Հանրապետության վարչապետ Արայիկ Հարությունյանը:
ԼՂՀ կառավարությունից NEWS.am-ին հայտնում են, որ հանդիպմանը քննարկվել է Արցախում բանկային համակարգի հետագա զարգացման հետ կապված որոշ հարցեր:
ԱՀ գործադիր իշխանության ղեկավարը նշել է, որ առանց բանկային համակարգի զարգացման անհնար է զարգացած տնտեսություն ունենալ: Այս առումով, Ա. Հարությունյանը կարեւորել է հատկապես վերջին տարիներին Արցախի տնտեսության մեջ բանկային կապիտալի կայուն ներգրավումը, ինչը հնարավորություն է ընձեռել մի շարք ոլորտներում զարգացման լուրջ առաջընթաց գրանցել:
«Ուրախալի է արձանագրել, որ մեր բոլոր արդեն կայացած ձեռնարկությունները հիմնադրվել եւ զարգացել են բանկային կապիտալի ներգրավման շնորհիվ: Կարծում եմ՝ կառավարության եւ բանկերի միջեւ անցած տարիների ընթացքում ձեւավորված ամուր եւ վստահելի համագործակցությունը խոստումնալից ապագա ունի, եւ նման հանդիպումները մեզ հնարավորություն են տալիս կառուցողական մթնոլորտում միասին քննարկելու ընթացիկ եւ ապագա ծրագրերը: Կառավարությունը շարունակելու է անհրաժեշտ դեպքերում հնարավորինս աջակից լինել ձեռնարկատերերին իրենց ֆինանսական խնդիրների կարգավորման հարցերում: Այդ ճանապարհով կկարողանանք արագ տեմպերով զարգացնել տնտեսությունը՝ երաշխավորելով պետության սոցիալ-տնտեսական ու անվտանգային հիմքերի ամրությունը»,- ասել է վարչապետը եւ հավելել, որ Արցախում գործող բանկերի մասնաճյուղերը զգալիորեն զարգացրել են սպասարկման ծառայությունները:
Հանդիպմանը մասնակից՝ բանկերի ներկայացուցիչները շնորհակալություն են հայտնել գործադիր իշխանության ղեկավարին՝ բանկային համակարգի նկատմամբ կառավարության կողմից մշտապես ցուցաբերվող ուշադրության եւ աջակցության համար: Նրանք իրենց պատրաստակամությունն են հայտնել շարունակել ակտիվ մասնակցություն ունենալ Արցախի տնտեսության զարգացման ծրագրերում: Ըստ ՀՀ բանկերի ներկայացուցիչների՝ Արցախում ֆինանսական ռիսկերը բավարար են նոր ներդրումային ծրագրեր իրականացնելու եւ վարկավորման նոր փաթեթներ առաջարկելու համար:
Վարչապետի եւ ՀՀ բանկերի ներկայացուցիչների հանդիպմանը մասնակցում էր ԱՀ ֆինանսների նախարար Սպարտակ Թեւոսյանը: