Հայաստանը 2015-ին 93.5 տոկոսով կատարել է պետական բյուջեի եկամուտների պլանը։ Այս մասին մայիսի 23-ին՝ խորհրդարանում 2015-ի պետբյուջեի կատարողականի քննարկման ժամանակ, ասել է ֆինանսների փոխնախարար, գլխավոր գանձնապետ Ատոմ Ջանջուղազյանը։

Նրա խոսքով՝ այդ ցուցանիշը նախորդ տարվա ցուցանիշը գերազանցել է 2 տոկոսով կամ 23 մլրդ դրամով։ 2015-ի արդյունքում փաստացի եկամուտները կազմել են 1167.7 մլրդ դրամ։ Հարկերի եւ պետական տուրքերի հավաքումը կազմել է 1067.9 մլրդ դրամ, պաշտոնական դրամաշնորհների մուտքը՝ 29.9 մլրդ դրամ (78.3 տոկոսով կատարում)։

Մյուս եկամուտները կազմել են մոտ 70 մլրդ դրամ (100.2 տոկոսով կատարում)։ Մասնավորապես պետական կազմակերպությունների արտաբյուջետային ֆոնդերի եկամուտները (Ոստիկանություն, Մաքսային ծառայություն) կազմել են 32.3 մլրդ դրամ (98.3 տոկոսով կատարում)։