Հայաստանի 2015-ի պետբյուջեի պակասորդը կտրուկ աճել է, իսկ նոր ծախսերը օգնել են պահպանել տնտեսական ակտիվությունը: Այս մասին մայիսի 23-ին հայտնել է ԿԲ ղեկավար Արթուր Ջավադյանը 2015-ի պետբյուջեի կատարման հարցերով խորհրդարանական հանձնաժողովի լսումների ժամանակ:

Նրա խոսքով, պակասորդն աճել է, որովհետեւ 2014-ի համեմատ 2015-ին ՀՆԱ-ի նկատմամբ պետբյուջեի եկամուտները կրճատվել են 0.5 տոկոսային կետով (մինչեւ 23.1 տոկոս), իսկ ծախսերը աճել են 2.4 տոկոսային կետով՝ կազմելով ՀՆԱ 27.9 տոկոսը: 2014-ին ՀՆԱ-ի նկատմամբ պետբյուջեի պակասորդի հարաբերակցությունը կազմել է 1.9 տոկոս: 2015-ին այն ծրագրված էր 2.3 տոկոս, բայց շատ ավելին է եղել՝ 4.8 տոկոս: ՀՆԱ-ի նախատեսվածից շատ ավելի ցածր աճի պայմաններում (տնտեսական աճը կազմել է 3 տոկոս՝ 4.1 տոկոսի փոխարեն) դրա նկատմամբ պետական պարտքը տարեվերջին հասել է 48.7 տոկոսի: Միաժամանակ կրճատվել է առեւտրի բացասական բալանսը, դրա հետ մեկտեղ նաեւ ընթացիկ հաշվի պակասորդը՝ 4.6 տոկոսային կետով՝ մինչեւ ՀՆԱ 2.6 տոկոս: Եվ այսպես, դոլարով արտահայտված՝ ներկրումը կրճատվել է 26. 5 տոկոսով ( մինչեւ 3 մլրդ 254 մլն դոլար), իսկ արտահանումը միայն 3.9 տոկոսով ( մինչեւ 1 մլրդ 487 մլն դոլար): «Ընդհանուր առմամբ Հայաստանի ֆինանսական ցուցանիշները կառավարելի սահմաններում են»,- միաժամանակ վստահեցրել է Ջավադյանը: