Բրիտանական Daily Mail թերթը հայտնել է ուղեւորներին չվերթներից հանելու ամենատարօրինակ պատճառները:
Ցուցակի մեջ մտել է վերջին դեպքը, որը տեղի էր ունեցել Փենսիլվանիայի համալսարանի պրոֆեսոր Գվիդո Մենցիոյի հետ American Airlines ինքնաթիռում: Տնտեսագետը հավասարումներ էր լուծում, բայց նրան մերձավորարեւելյան ահաբեկչի տեղ էին դրել: Մենցիոյից բողոքել էր նրա դիմաց նստած ուղեւորուհին, բայց արդյունքում պրոֆեսորին թույլատրել էին վերադառնալ իր տեղը, հայտնում է Gazeta-ն:
2011-ին հոլիվուդյան հայտնի դերասան Ալեք Բոլդուինին չվերթից հանել էին հեռախոսը անջատելուց հրաժարվելու (դերասանը բառային Words With Friends խաղ էր խաղում) եւ անձնակազմի նկատմամբ կոպտության համար: Միջադեպը տեղի է ունեցել American Airlines-ի ինքնաթիռում:
2011-ի սեպտեմբերին Greenday խմբի վոկալիստ Ջո Արմսթրոնգին հանել են ինքնաթիռի սրահից «չափազանց» ներքեւ իջեցված տաբատի համար: 2013-ի մայիսին American Airlines-ի ինքնաթիռը ստիպված է եղել չնախատեսված վայրէջք կատարել, որովհետեւ ուղեւորներից մեկը հրաժարվում էր դադարել երգել Ուիթնի Հյուսթոնի I Will Always Love You երգը:
2011-ի մարտին Horizon Air-ի ուղեւորին խնդրել են ինքնաթիռից իջնել «չափից ավելի երկար» ոտքերի պատճառով: Բորտուղեկցորդները պնդում են, որ տղամարդն արգելափակում էր անցումը, միաժամանակ նրանք հրաժարվել էին ուրիշ տեղ նստեցնել նրան: Հետագայում ավիաընկերությունը ուղեւորից ներողություն էր խնդրել:
2016-ի ապրիլին մահմեդական ուղեւոր Հաքիմ Աբդուլին հանել էին Southwest Airlines-ի չվերթից, որովհետեւ նրա պատճառով ուղեկցորդուհին իրեն «անհարմարավետ» էր զգում: 2015-ի օգոստոսին կինը ստիպված էր եղել լքել United Express ինքնաթիռը, որովհետեւ հրաժարվել էր իր շանը տեղավորել տեղափոխող պայուսակի մեջ, իսկ 2014-ի նոյեմբերին US Airways չվերթից հանել էին «անկառավարելի» խոզին եւ նրա տիրուհուն: