Երեւանի Վերին Շենգավիթի 2-րդ փողոցի 16 տան տանիքն այսօր՝ մայիսի 23-ին  ամբողջությամբ պոկվել է փոթորիկից: (ֆոտոռեպորտաժ)

«Ահավոր քամի էր, փոթորիկ էր, նման բան չէինք տեսել: Հենց սկսվեց, ես տանն էի, վազելով դուրս եկա որովհետեւ տունը կիսաքանդ է, կարող էր փլվել: Դրսում անկյունում կանգնած էի, տեսնեմ՝ քամուց տանիքը պոկվեց, ընկավ»,- NEWS.am-ին պատմեց Վարդուհի Արթինյանը:

Արթինյանները կիսաքանդ տանն ապրելու վախից վերջերս տեղափոխվել են վարձով բնակության, բարեբախտաբար, երեխաներ չեն եղել տանը: 8-հոգանոց ընտանիքը երկար տարիներ է՝ պայքարում է տուն ստանալու համար, սակայն ապարդյուն:

«1996թ. քաղաքաշինության նախարարը որոշում ա տվել մեզ, որ մեր տունն է սա, բայց  հիմա քաղաքապետարանն ասում է՝ չկա նման որոշում, չեն գտնում: Մեզ, որպես վթարային տան բնակիչներ, պետք է բարձրահարկ շենքում բնակարան տային, բայց չեն տալիս, այս տունն էլ գնալով փլվում է, ընտանիքի անդամներից մեկը չկա, որ տուժած չլինի այստեղի առնետներից»,- բողոքեց Վարդուհի Արթինյանը:

Նշենք, որ այսօր ժամը 15:15-ի սահմանում բարձրացած անսպասելի ուժեղ քամուց մայրաքաղաքում տների տանիքներ են պոկվել, ծառեր արմտախիլ եղել: