Հնդկաստանի Ութար Փրադեշի նահանգում անցյալ գիշեր ավազահողմի պատճառով 9 մարդ է զոհվել: Այս մասին հայտնել են նահանգի ոստիկանությունից, փոխանցում է ՏԱՍՍ-ը:
Ուժեղ քամին տապալել է ծառեր, էլեկտրահաղորդման լարեր եւ գովազդային վահանակներ: Մասնավորապես արմատախիլ է եղել Թաջ Մահալի դամբարանի տարածքում աճող հսկայական ծառը: Փոթորիկը մոլեգնել է 12 ժամ շարունակ:
Ավազահողմից հետո նահանգի տարածքում ուժեղ անձրեւ է տեղացել: Իշխանությունների գնահատմամբ՝ ոչնչացվել է մանգոյի բերքի 70 տոկոսը եւ հացահատիկային բույսերի 50 տոկոսը:
