ՀՀ տրանսպորտի եւ կապի նախարար Գագիկ Բեգլարյանը պնդում է, որ թիկնապահներ չունի եւ կապ չունի նախարարության հարակից բակում մայիսի 16-ին տեղի ունեցած ծեծկռտուքի հետ:
Այս մասին հաղորդագրություն է տարածել նախարարությունը:
«Լրատվամիջոցներով տարածված տեղեկատվության եւ ՀՀ քննչական կոմիտեի հայտարարության համաձայն՝ ՀՀ տրանսպորտի եւ կապի նախարարության բակային հատվածում 2016 թվականի մայիսի 16-ին՝ ժամը 16:30-ի սահմաններում տեղի է ունեցել միջադեպ, որի կապակցությամբ հարկ ենք համարում տեղեկացնել, որ ՀՀ տրանսպորտի եւ կապի նախարար Գագիկ Բեգլարյանը թիկնապահներ չունի, եւ նշված միջադեպի հետ որեւէ առնչություն չունի»,- ասված է հաղորդագրության մեջ:
Նշենք, որ ծեծկռտուքի դեպքով կալանավորված է 4 անձ, որոնք, ըստ մամուլի հրապարակումների, Գագիկ Բեգլարյանի թիկնապահներն են:
Ըստ ՔԿ հաղորդագրության՝ 2016 թ. մայիսի 16-ին՝ ժամը 16:30-ի սահմանում, Տրանսպորտի և կապի նախարարության բակային հատվածում տեղի է ունեցել վիճաբանություն, որի ընթացքում բռնություն է գործադրվել 5 անձի նկատմամբ՝ պատճառելով տարբեր աստիճանի մարմնական վնասվածքներ։ Նշանակվել են դատաբժշկական փորձաքննություններ՝ վնասվածքների ծանրության աստիճանը պարզելու համար։ Ստացվել է տուժողներից մեկի՝ Հ.Պետրոսյանի նկատմամբ նշանակված փորձաքննության եզրակացությունը, ըստ որի՝ նրան պատճառված վնասվածքները գնահատվել են ծանր՝ կյանքին վտանգ սպառնացող։
Դեպքի առթիվ հարուցված քրեական գործի շրջանակում պարզվել է վիճաբանության շարժառիթը, կիրառված բռնությանը մասնակցություն ունեցած 6 անձի ինքնությունը, անհատականացվել են նրանց գործողությունները։
Ձեռք բերված ապացույցների հիման վրա 4 անձի ՝ Ա. Կարախանյանին, Ս. Վարդանյանին, Վ. Սարգսյանին եւ Հ. Շմոյանին մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 6-րդ կետով։ Քննիչը միջնորդություն է ներկայացրել դատարան՝ նրանց նկատմամբ որպես խափանման միջոց կալանավորումը կիրառելու վերաբերյալ, ինչը բավարարվել է։ Ծանր մարմնական վնաս պատճառելու կասկածանքով մայիսի 21-ին ձերբակալվել է Վ.Մկրտչյանը: Որոշում կայացվել ևս մեկ անձի՝ Ա.Կարախանյանին ձերբակալելու մասին, ինչի կատարումը հանձնարարվել է ոստիկանության համապատասխան ստորաբաժանումներին։