Կամչատկայի բնակչուհին 4,5 մլն ռուբլի (69 000 դոլար) է փոխանցել խարդախին, որը ներկայացել էր որպես Միջուկային հետազոտությունների եվրոպական կենտրոնի (ՄՀԵԿ) գիտնական: Այդ մասին հայտնում է Ռուսաստանի ՆԳՆ-ի մարզային վարչությունը:
Ոստիկանություն է դիմել Պետրոպավլովսկ-Կամչատսկիի 50-ամյա բնակչուհի, որը հայտնել է, որ փետրվարի սկզբին սոցցանցում ծանոթացել է ԱՄՆ-ի քաղաքացու հետ, որը պատմել է, իբր աշխատում է ՄՀԵԿ-ի գաղտնի նախագծերի վրա` Արուբա կղզում, հայտնում է Lenta-ն:
«Երեք ամիս տեւած շփման ընթացքում նա խաբեության միջոցով եւ չարաշահելով վստահությունը տուժած կնոջից գողացել է ընդհանուր առմամբ չորս ու կես միլիոն ռուբլի: Կինը բանկից վարկ է վերցրել, վաճառել է իր բնակարանը եւ պարտք է վերցրել ընկերներից: Նա վստահ է եղել, որ իր հետ նամակագրություն վարողը կամուսնանա իր հետ եւ երեխաների հետ կտեղափոխվի Պետրոպավլովսկ-Կամչատսկի», — նշել են ՆԳՆ-ից:
Տուժած կինը պատմել է նաեւ, որ սիրեցյալը խոստացել է ամերիկյան բանկում 25 հազար դոլարով նրա բացած հաշվին փոխանցել 1,5 մլն դոլարը, որը նրան իբր պարտք էր ՄՀԵԿ-ը: Այդ միջոցներով կինը նախատեսել էր ավելի ընդարձակ բնակարան գնել, որպեսզի իր ապագա ամուսինը կարողանա այնտեղ տեղավորվել իր երկու անչափահաս տղաների հետ:
Ոստիկանությունը ստուգում է սկսել դիմումի փաստով:
