2014թ. հոկտեմբերի 31-ին Երեւանում ավազակային հարձակում կատարելու մեջ մեղադրվող Վազգեն Սեկոյանը դատապարտվեց 6 տարվա ազատազրկման: Մայիսի 24-ին Երեւանի Կենտրոն եւ Նորք Մարաշ վարչական շրջանների ընդհանուր իրավասության դատարանում նման որոշում կայացրեց դատավոր Մեսրոպ Մակյանը:
35-ամյա Վազգեն Սեկոյանի գործով դատաքննությունն անցկացվել է արագացված կարգով:
Ըստ մեղադրական եզրակացության՝ Վազգեն Սեկոյանը նախնական համաձայնության է եկել Նաիրի Մարությանի հետ եւ Երևանի Ամիրյան 15 շենքի բնակարաններից մեկի մուտքի մոտ հարձակում են գործել բնակչուհի Ռուզաննա Երիցյանի վրա: Այնուհետեւ երիտասարդներն ապօրինի մուտք են գործել նույն բնակարան, թափանցիկ կպչուն ժապավենով կապել նրա բերանը, ապա ձեռքերով և ոտքերով բազմաթիվ հարվածներ հասցրել նրա մարմնի տարբեր մասերին` պատճառելով առողջությանը միջին ծանրության վնաս: Սեկոյանն ու Մարությանը կնոջը պատճառել են 2 մլն 350 հազար գույքային վնաս:
Սեկոյանին մեղադրանք էր առաջադրվել Քրեական օրենսգրքի 175-րդ մասի 1-ին, 2-րդ եւ 3-րդ կետերով: Դեպքից անմիջապես հետո Սեկոյանը երկրից դուրս էր եկել: Իրավապահ մարմինները նրան հայտնաբերել են այս տարի գարնանը եւ մարտի 12-ին հանձնվել է Հայաստանի իրավապահ մարմիններին:
Մարությանը հայտնաբերվել էր 2015թ. նոյեմբերի 18-ին Երեւանի «Զվարթնոց» օդանավակայանում եւ կալանավորվել: Նրան մեղադրանք էր առաջադրվել, մեղադրանքն ապացուցվել էր, Մարությանը դատապարտվել էր 6 տարվա ազատազրկման: