ԳԴՀ-ի կանցլեր Անգելա Մերկելը Frankfurter Allgemeine Zeitung թերթին տված հարցազրույցում հայտնել է, որ իր կարծիքով Եվրամիության եւ Թուրքիայի միջեւ միգրացիոն համաձայնագիրը ձախողման դատապարտված չէ, հայտնում է «ՌԻԱ Նովոստին»:
«Խոսակցություններ կային, թե համաձայնագիրը երբեք չի կայանա, չարժե նույնիսկ փորձել: Երբ կայացավ, ասում էին, թե երբեք չի գործի: Կլինեն նոր խնդիրներ, եւ կասեն, որ այ հիմա արդեն միանշանակորեն պարզ է դարձել, որ համաձայնագիրն իրոք տապալման է դատապարտված: Ես այդպես չեմ կարծում, ես այդպես չեմ աշխատում» — ասել է Մերկելը:
Նրա խոսքով, համաձայնագրի իրականացումը գործընթաց է, որի վրա կշարունակվի հետեւողական աշխատանքը: Նա նշել է, որ եթե որոշ պահեր, ինչպիսին Թուրքիայի քաղաքացիների համար վիզայի ռեժիմի չեղյալ համարելն է, ձգձգվում են բոլոր անհրաժեշտ պայմանների չկատարման պատճառով, ԵՄ-ը կաշխատի այդ դժվարությունները հաղթահարելու համար:
Ավելի վաղ Թուրքիայի նախագահ Էրդողանը ԵՄ-ին սպառնացել էր դուրս գալ միգրացիոն համաձայնագրից, եթե Եվրամիությունն իր երկրի քաղաքացիներին առանց վիզայի ռեժիմ չտրամադրի:
Մայիսի սկզբին Եվրահանձնաժողովը (ԵՀ) Եվրախորհրդարանին (ԵԽ) եւ ԵՄ-ի Խորհրդին առաջարկել է հանել վիզայի սահմանափակումները Թուրքիայի համար, եթե Անկարան մինչեւ հունիսի վերջ կատարի վիզաները հանելու համար մնացած պայմանները: Դրանց թվին են դասվում կոռուպցիայի կանխարգելման միջոցները, Եվրապոլի հետ օպերատիվ համաձայնագրերի շուրջ բանակցությունների անցկացումը, բոլոր անդամ երկրների հետ դատական համագործակցությունը, ահաբեկչության դեմ պայքարի օրենսդրության վերանայումը:
ԵԽ-ի նախագահի պաշտոնական ներկայացուցիչ Մարտինա Շուլցը «ՌԻԱ Նովոստիին» հայտնել է, որ Եվրախորհրդարանը Թուրքիայի քաղաքացիներին առանց վիզայի ռեժիմի տրամադրման օրենսդրական գործընթացը կսկսի այն բանից հետո միայն, եթե Անկարան կատարի դրա հետ կապված ԵՄ-ի բոլոր պահանջները: Էրդողանը հայտնել է, որ Թուրքիան չի վերանայի իր հակաահաբեկչական օրենսդրությունը եւ ԵՄ-ին երկերեսանիության համար է մեղադրել: