Կորեայի Հանրապետության խոշորագույն Samsung կորպորացիան հայտնել է, որ պատրաստվում է մտավոր սեփականության խախտման գործով պատասխան հայց ներկայացնել չինական Huawei ընկերության նկատմամբ, որը նմանատիպ բողոքով է դիմել Կալիֆորնիայի նահանգի եւ չինական Շենչժեն քաղաքի դատարան, հայտնում է ՏԱՍՍ-ը:
«Մենք մտադիր չենք հաշտվել Huawei-ի կողմից նման գործողությունների հետ եւ պետք է նրան նույն կերպ պատասխանենք», - մամուլի ասուլիսին հայտնել է հարավկորեական կոնցերնի մտավոր սեփականության պաշտպանության բաժանմունքի ղեկավար Ան Սին Խոն:
Ավելի վաղ «Սինհուա» գործակալությունը հայտնել էր, որ էլեկտրոնիկայի եւ բջջային հեռախոսների չինացի արտադրողը մտադիր է դատի տալ Samsung-ին, որի պատճառով «վնասներ է կրել արտոնագրման ընթացակարգերի խախտման հետեւանքով»: «Ներկա պահին մեր ընկերությունը արտոնագրերի օգտագործման վերաբերյալ արդեն նման համաձայնագրեր է կնքել առեւտրական տասնյակ կազմակերպությունների հետ», - լրագրողներին հայտնել է մտավոր սեփականության պաշտպանության բաժանմունքի ղեկավար Դին Ցզյանսինը: Նրա խոսքով, միայն 2015-ին ընկերությունը 9,2 մլրդ դոլար է ծապխսել գիտական մշակումների վրա, ինչը համարժեք է նույն ժամանակաշրջանում կորպորատիվ եկամտի 15 տոկոսին:
Պաշտոնական վիճակագրության համաձայն, սմարթֆոնների երկու խոշորագույն արտադրողին` Samsung-ին եւ Apple-ին բաժին է ըմկնում գլոբալ շուկայի մոտ 38 տոկոսը: Huawei-ը Չինաստանում առաջատար ընկերություն է այդ սեգմենտում, նրան բաժին է ընկնում աշխարհում բջջային հեռախոսների վաճառքի ավելի քան 8 տոկոսը: