ԵՄ-ին անդամակցելը Թուրքիայի համար միակ տարբերակը չէ Եվրոպայի հետ հարաբերությունների տեսակետից: Այս մասին մայիսի 25-ին ասել է Թուրքիայի՝ ԵՄ հարցերով նախարար Օմեր Չելիքը իր լիազորությունները ստանձնելու արարողությանը, փոխանցում է ՏԱՍՍ-ը:
«ԵՄ-ին Թուրքիայի լիիրավ անդամակցության հեռանկարը Թուրքիայի պետական քաղաքականության մասն է, եւ մենք կշարունակենք շարժվել այդ ուղղությամբ: Մեզ համար դա կարեւոր է, բայց միաժամանակ ԵՄ-ին անդամակցելը Թուրքիայի համար միակ տարբերակը չէ», - ասել է նա:
Չելիքի խոսքով՝ այս պահին ԵՄ-ի հետ հարաբերությունները տարածաշրջանային եւ համաշխարհային ճգնաժամերի պատճառով հայտնվել են խաչմերուկում:
«Մենք չենք ուզում, որ ԵՄ-ն երկակի չափանիշներ կիրառի ահաբեկչության դեմ պայքարի հարցում: Դա պաշտպանության համար Թուրքիայի օրինական իրավունքն է, իսկ ահաբեկչությունը սպառնում է մեր երկրի ներքին անվտանգությանը», - ասել է նախարարը:
Հիշեցնենք, որ մայիսի 24-ին Թուրքիայի նախագահ Ռեջեփ Թայիփ Էրդողանը ԵՄ-ին նախազգուշացրել էր, որ Անկարան կարող է վերանայել ԵՄ-ի հետ պայմանավորվածությունները, եթե Եվրոպան շարունակի պահանջել վիզայի չեղարկման համար անհրաժեշտ կետերի կատարումը:
