Սարդարապատի ճակատամարտի 98-ամյակին ընդառաջ Երեւանի ավագանին մայիսի 25-ին գումարված հերթական նիստում, որը վարել է Երեւանի քաղաքապետ Տարոն Մարգարյանը, հավանություն է տվել Ավան վարչական շրջանի Շահինյան փողոցի 4-րդ նրբանցքը եզդիների ազգային հերոս Ջահանգիր աղայի անվամբ անվանակոչելու որոշման նախագծին:
Ի հիմնավորում վերոնշյալ որոշման ընդունման անհրաժեշտության` նշվել է, որ եզդի ժողովրդի ազգային հերոս Ջահանգիր աղան նախ իր զինվորների օգնությամբ Հայոց ցեղասպանության տարիներին ապահովել է բազմաթիվ հայ եւ եզդի գաղթականների անվտանգ տեղափոխումը Արեւելյան Հայաստան։ Իսկ 1918 թվականին նա իր 1500 հոգանոց հեծյալ ջոկատով նաեւ ակտիվ մասնակցություն է ունեցել Սարդարապատի եւ Բաշ-Ապարանի ճակատամարտերին: Ջահանգիր աղան իր ջոկատով պայքարը շարունակել է նաեւ Հայկական բանակի կազմում՝ Դրաստամատ Կանայանի հրամանատարության ներքո: Ցուցաբերած քաջության եւ խիզախության համար պարգեւատրվել է «Գեւորգյան» խաչով։
Հարկ է նշել, որ փողոցի անվանակոչության վերաբերյալ միջնորդությունները ներկայացվել էին Հայաստանում եզդիական մի շարք հասարակական կազմակերպությունների եւ միավորումների կողմից:
Հերթական նիստի օրակարգում ընդգրկված մյուս հարցերը եւս արժանացել են ավագանու հավանությանը:
Երեւանի ավագանու հերթական հաջորդ նիստը որոշվել է գումարել հունիսի 24-ին:
