ՀՀ Տնտեսական մրցակցության պաշտպանության պետական հանձնաժողովի նախագահ Արտակ Շաբոյանն ընդունել է Հայաստանում ՌԴ առեւտրային ներկայացուցիչ Անդրեյ Բաբկոյին եւ առեւտրային խորհրդատու Իգոր Զինովեւին եւ նրանց առջեւ բարձրացրել արտահանմամբ զբաղվող հայ գործարարներին վերաբերող խնդիրները:
ՏՄՊՊՀ-ից NEWS.am-ին հայտնում են, որ հանդիպումը նախաձեռնել էր ՀՀ-ում Ռուսաստանի Դաշնության առեւտրային ներկայացուցչությունը՝ արձագանքելով ՏՄՊՊՀ նախագահի կողմից բարձրացված մի շարք խնդիրների, որոնք վերաբերում են արտահանմամբ զբաղվող հայ գործարարներին:
Հանդիպման ընթացքում մասնավորապես քննարկվել են Հայաստանից ԵՏՄ անդամ երկրներ արտահանման ոլորտում առաջացած մրցակցային խնդիրներն ու դրանց լուծման ուղիները: Ա. Շաբոյանը ընդգծել է ԵՏՄ անդամ բոլոր երկրների համար առեւտրի եւ ծառայությունների միասնական սկզբունքների կանոնակարգման անհրաժեշտությունը, ինչը լիարժեք իրավական հիմքի վրա կդնի մատակարար-առեւտրային ցանց փոխհարաբերությունները: Պաշտոնյաները պատրաստակամություն են հայտնել իրենց իրավասության շրջանակներում աջակցելու՝ ի հայտ եկած խնդիրների լուծման հարցում: