Յորքի համալսարանի հնագետները ֆրանսիական Հարավային Ալպերի շրջանում Աբրի Ֆարավել քարանձավի ժայռապատկերների սկանավորում են կատարել, որոնք գտնվում են ծովի մակարդակից 2 133 մ բարձրության վրա: Կենդանիների հայտնաբերված պատկերները թույլ են տալիս քարանձավը համարել մեզոլիթի ժամանակաշրջանում մարդու գործունեության ամենաբարձր վայրը, հայտնում է Gazeta-ն:
«Մենք ենթադրում էինք փոքրիկ փորագրություններ հայտնաբերել, ինչպես, օրինակ, Հրաշքների հովտում (Ֆրանսիայի հարավ-արեւելքում գտնվող հովտում բրոնզե դարի ավելի քան 40 հազար ժայռապատկեր կա», — պատմում է հետազոտության ղեկավար, հնագիտության պրոֆեսոր Քեվին Ուոլշը:
Նրա կարծիքով, սա նման բարձրության վրա ժայռապատկերների սկանավորման առաջին գիտական փորձն է: Դրված առաջադրանքը տեխնիկապես դժվար իրականացվելի էր, որովհետեւ լազերային սկանավորման համար սարքավորումները դժվար էր հասցնել քարանձավ:
Անցկացված հետազոտությունը ավելի լայնածավալ գիտական նախագծի մի մասն էր Հարավային Ալպերում բրոնզե դարից սկսած` մարդու գործունեության ուսումնասիրման ուղղությամբ:
Աբրի Ֆարավել քարանձավն առաջին անգամ հայտնաբերվել է 2010-ին: Ավելի վաղ այնտեղ հայտնաբերվել էին կայծքարե աշխատանքային գործիքներ, երկաթի դարաշրջանի կերամիկա, հռոմեական ֆիբուլներ (հագուստի կոճգամներ) եւ մի քանի միջնադարյան մետաղական արտադրանք:
