Հայ ժողովուրդն այսօր էլ պայքարում է իր ներքին ու արտաքին խնդիրները լուծելու համար, իսկ Հայաստանի Հանրապետությունն իսկական ոգեշնչում է ամբողջ աշխարհի համար: Այս մասին այսօր՝ մայիսի 26-ին, ՀՀ նախագահի նստավայրում ասաց ամերիկահայ գրող, Պուլիցերյան մրցանակակիր Փիթեր Բալաքյանը, որը Հայոց ցեղասպանության ճանաչման գործում նշանակալի ավանդ ունենալու համար մրցանակի արժանացավ նախագահի կողմից:
«Հայերենին չեմ տիրպետում, բայց ներծծել եմ հայկական մշակույթի առանձնահատկությունները, զգում եմ հայկական եկեղեցիները, խաչքարերը: Կարծում եմ՝ հայկական ընտանեկան արժեքները հարստացնում են հայ ժողովրդին: Ինքս տարբեր երկրների հայկական համայնքներում եմ եղել: Նրանք ակտիվ են եւ մասնակցում են այդ երկրի հասարակական կյանքին: Ըստ իս, հայերը զարգանում են սեփական մշակույթի շուրջ՝ որպես համաշխարհային մշակույթի մաս, իսկ մենք եզակի մշակույթ ունենք»,- ասաց Փիթեր Բալաքյանը:
Ամերիկահայ գրողի խոսքով՝ անգամ մեր ներքին եւ արտաքին խնդիրներով եւ այն պայքարով, որ մղում ենք այդ խնդիրների լուծման համար՝ Հայաստանն իսկապես ոգեշնչում է ամբողջ աշխարհի համար:
Հիշեցնենք, որ 2003 թվականին լույս տեսած Փիթեր Բալաքյանի «Այրվող Տիգրիս. Հայոց ցեղասպանություն և Ամերիկայի արձագանքը» ծավալուն փաստավավերագրական աշխատությունը «Նյու Յորք Թայմս» թերթի կողմից ճանաչվել է «Տարվա նշանակալից գիրք»։ 1998-ին «Ճակատագրի սև շունը» հուշագրությունը ճանաչվել է «Տարվա լավագույն գիրք»։ 2010թ. հայերենով հրատարակվել է հեղինակի «Լույսի տխուր օրերը» բանաստեղծությունների ժողովածուն։
Բալաքյանը իր գրչընկերոջ՝ Արիկ Սևակի հետ անգլերեն է թարգմանել ու հրատարակել իր պապի եղբոր՝ արքեպիսկոպոս Գրիգորիս Պալաքյանի «Հայկական Գողգոթա» խորագրով ծավալուն հուշագրությունը:
2016 թվականին «Օզոնի հանդես» բանաստեղծությունների շարքի համար «Պոեզիա» անվանակարգում արժանացել է Պուլիտցերյան մրցանակի:
