Բարձր արվեստի միջոցով մենք կարողանում ենք մարդկայնացնել Հայոց ցեղասպանության անբարո, սոսկալի եւ բարբարոս երեւույթները; Այս մասին այսօր՝ մայիսի 26-ին, լրագրողների հետ զրույցում ասաց ամերիկահայ գրող, Պուլիցերյան մրցանակակիր Փիթեր Բալաքյանը, որն այս օրերին Երեւանում է:
«Քաղաքականություն, պատմություն եւ այլն... առաջին հերթին պատմության հաստ շերտերը ճեղքող գրականության ուժի շնորհիվ մենք կարող ենք դեպի մարդկություն դուրս բերել Հայոց ցեղասպանությունը եւ մարդուն հուզող խնդիրները: Սա բարդ գործընթաց է, որը խառնում է անհարիր բեւեռներ, անհարիր վիճակներ: Բարձր արվեստի շնորհիվ մենք կարողանում ենք ճեղքել քաղաքական իրադարձությունը եւ մարդկայնացնել Ցեղասպանության անբարո, սոսկալի, բարբարոս երեւույթները եւ այն դարձնել ընթերցողի սեղանի վրա գիրք:
Հիշեցնենք, որ 2003 թվականին լույս տեսած Փիթեր Բալաքյանի «Այրվող Տիգրիս. Հայոց ցեղասպանություն և Ամերիկայի արձագանքը» ծավալուն փաստավավերագրական աշխատությունը «Նյու Յորք Թայմս» թերթի կողմից ճանաչվել է «Տարվա նշանակալից գիրք»։ 1998-ին «Ճակատագրի սև շունը» հուշագրությունը ճանաչվել է «Տարվա լավագույն գիրք»։ 2010թ. հայերենով հրատարակվել է հեղինակի «Լույսի տխուր օրերը» բանաստեղծությունների ժողովածուն։
Բալաքյանը իր գրչընկերոջ՝ Արիկ Սևակի հետ անգլերեն է թարգմանել ու հրատարակել իր պապի եղբոր՝ արքեպիսկոպոս Գրիգորիս Պալաքյանի «Հայկական Գողգոթա» խորագրով ծավալուն հուշագրությունը:
2016 թվականին «Օզոնի հանդես» բանաստեղծությունների շարքի համար «Պոեզիա» անվանակարգում արժանացել է Պուլիտցերյան մրցանակի: