Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության ականատես, նրա համակուրսեցի Տիգրան Դեմիրճյանը դեպքից հետո հոգեբանի եւ հոգեբույժի օգնության է դիմել: Այս մասին այսօր՝ մայիսի 26-ին, Ավան եւ Նոր Նորք վարչական շրջանների ընդհանուր իրավասության դատարանում գործով դատական նիստին հարցաքննության ժամանակ ասաց Տիգրան Դեմիրճյանը:
«Դեպքից հետո չէի կարողանում հասկանալ՝ ինչ կատարվում էր: Չէի կարողանում խոսել, ճիշտ հասկանալ, աչքերիս դեմը անընդհատ սեւանում էր, կակազում էի: Հետո մոտս սկսվեցին գլխացավեր, գլխապտույտներ, ուշաթափվում էի մեկ-մեկ: Հոգեբանի ու հոգեբույժի օգնության ենք դիմել, ախտորոշում են տվել ու ներարկումներ են նշանակել»,- ասաց նա:
Տիգրանն իր տեսածը սպանություն որակեց:
«Եկել են ննջասենյակ, սպանել, տարել են: Սպանություն է, որովհետեւ իմ տեսածով, իմ ենթադրությունով եկան, հավաքվեցին, հետո սրտխառնոց, հայհոյանք, հետո ձայն չի հանել Հայկազը: Ու հիշում եմ, որ քսացնելով էին տանում սենյակից»,- ասաց Տիգրանը:
Տիգրան Դեմիրճյանի ցուցմունքում պաշտպանյալները հակասություն նկատեցին: Դատական նիստը հետաձգվեց: Նրա նախաքննական ցուցմունքը կհրապարակվի հաջորդ դատական նիստին:
Նշենք, որ Տիգրանը պատմել էր, որ ինքը տեսել է մեղադրյալներին սենյակում՝ Հայկազի մահճակալի շուրջը, լսել է Հայկազի ձայնը, ինչպես է նա փսխում եւ վախեցել է, չի միջամտել: Այնուհետեւ նա տեսել է՝ ինչպես են Հայկազին տանում սենյակից, լսել է՝ ինչպես են մեղադրյալները որոշում՝ կախե՞լ Հայկազի մարմինը, թե՞ պատշգամբից ցած նետել այն:
Նշենք, որ Տիգրան Դեմիրճյանը ընդգրկված է գործում որպես տուժող: Նա կոնֆլիկտ է ունեցել մեղադրյալներից Մովսես Ազարյանի հետ, որի ժամանակ Մովսեսը հարվածել է նրան քունքի հատվածում: Դեպքից հետո նա Վազգեն Սարգսյանի անվան ռազմական ինստիտուտից տեղափոխվել է Արմենակ Խանփերյանցի անվան ռազմական ավիացիոն ինստիտուտ:
Հիշեցնենք, որ Հայկազ Բարսեղյանի սպանության համար մեղադրվում են նրա համակուրսեցիները` կուրսանտներ Գնել Թեւոսյանը, Նորիկ Սահակյանը, Վաչե Սահակյանը եւ Մովսես Ազարյանը։ Ըստ մեղադրանքի՝ նրանք հունվարի 29-ին՝ ժամը 02:00-ից 03:00-ի սահմանում, զորամասի ննջարանում դաժանությամբ սպանել են կուրսանտ Հայկազ Բարսեղյանին, ապա հետքերը թաքցնելու նպատակով կախել նրա մարմինը մարզահրապարակում գտնվող պտտաձողից, նրա անունից գրություն թողել, թե իբր ինքնասպան է եղել: Ամբաստանյալներն իրենց մեղավոր չեն ճանաչում: