Ռուսաստանն ու Իրանը մտադիր են առաջիկա շաբաթներին լուծել այն խնդիրները, որոնք անհրաժեշտ են «Բուշեր» ԱԷԿ-ի երկրորդ ու երրորդ էներգաբլոկների շինարարության նախագծի լայնածավալ աշխատանքները սկսելու համար, այս մասին մայիսի 27-ին հայտնել է «Ռոսատոմ» պետկորպորացիայի կոմունիկացիաների բաժինը, հայտնում է «ՌԻԱ Նովոստին»:
Հաղորդագրության մեջ նշված է, որ «Ռոսատոմի» գլխավոր տնօրենի տեղակալ Նիկոլայ Սպասկին անցկացրել է աշխատանքային խորհրդակցությունների հերթական փուլը Իրանի Ատոմային էներգիայի հարցերով կազմակերպության ղեկավարի տեղակալ Բեհրուզ Կամալվանդիի ու Ռուսաստանում Իրանի դեսպան Մեհդի Սանաիի հետ:
«Ուշադրության կենտրոնում երկկողմանի համագործակցության հարցերն էին «Բուշեր ԱԷԿ» –ի վերաբերյալ: Մասնակիցները մանրակրկիտ քննարկեցին այն խնդիրները, որոնք պահանջվում է լուծել առաջիկա շաբաթներին՝ թիվ 2 ու թիվ 3 բլոկներում լայնածավալ աշխատանքներ սկսելու համար»,- ասվում է հաղորդագրության մեջ:
