Մեկ տարի առաջ ՀԱՊԿ անդամ պետությունների ղեկավարները ստորագրել են մինչեւ 2020 թվականի հակաթմրադեղային ռազմավարությունը, ինչը վկայում է այն մասին, որ աշխատանքի այս ուղղությունը պահանջված է: Այս մասին ՀԱՊԿ երկրների գլխավոր նարկոլոգների համակարգիչ խորհրդակցության նիստի բացման ժամանակ հայտնել է ՀԱՊԿ գլխավոր քարտուղար Նիկոլայ Բորդյուժան:
Նրա խոսքով, ռազմավարությունը երկու բաղկացուցիչ ունի ու դրանցից մեկը ուժայինն է: «Ուժային բաղկացուցիչի շրջանակում մենք անցկացնում ենք գործողություններ, մշակում միջոցառումներ, այդ թվում հատուկ ստորաբաժանումների գործածումով, մանավանդ Աֆղանստանից ու այլ պետություններից թմրադեղերի փոխադրման մոխրագույն գոտիների վերհսկողության հարցերով:Բայց մենք հասկանում ենք,ո ր միայն ուժային մեթոդներով թմրամոլության դեմ պայքարել հնարավոր չէ: Ահա թե ինչու մենք նման նշանակություն ենք տալիս ՀԱՊԿ պետությունների գլխավոր նարկոլոգների խորհրդակցությանը:
Մենք այստեղ շատ մեծ ներուժ ենք տեսնում՝ ուժային կառույցների հետ փոխգործակցության ներուժը, մենք ձեզնից ակնկալում ենք տեղեկություններ թմրադեղերի նոր տեսակների մասին, որոնց հետ առաջինը դուք եք առնչվում, որպեսզի հակաթմրադեղային գերատեսչությունների շրջանակում մեր գործունեությունը շտկենք»- ասել է նա:
Բորդյուժան հույս է հայտնել, որ համագործակցությունը կխորանա բուժման նոր մեթոդների մշակման, թմրանյութերից կախում ունեցողների բուժման ոլորտում գիտահետազոտական աշխատանքների ուղղությամբ: Նա նաեւ նշել է ԵԱՀԿ ԽՎ ներուժը օգտագործելու պատրաստակամությունը, որպեսզի ներդաշնակեցվի օրենսդրությունը, միասնական ստանդարտներ ապահովվեն թե բուժման մեջ, թե ՀԱՊԿ պետությունենրում արգելված թմրանյութերի ցուցակներ կազմելու հարցում: Նա հույս է հայտնել, որ այս քննարկումների արդյունքում կմշակվեն նոր առաջարկներ պետությունների ղեկվարներին, որոնք հետագայում կվերածվեն իրական լուծումների:
Լրագրողների հետ զրույցում Նիկոլայ Բորդյուժան հայտնել է, որ այսօրվա խորհրդակցության արդյունքները կներկայացվեն ՀԱՊԿ անդամ երկրների անվտանգության խորհուրդների քարտուղարությունների կոմիտեի նիստի ժամանակ, որը կկայանա մի քանի օրից Երեւանում:
Նիկոլայ Բորդյուժան Հայաստանի ԱՆ գլխավոր նարկոլոգ Պետրոս Սեմերջյանին ու Ռուսաստանի ԱՆ գլխավոր նարկոլոգ Եվգենի Բրյունին ՀԱՊԿ 20-ամյակի շքանշաններ է հանձնել:
ՀԱՊԿ երկրների գլխավոր նարկոլոգների համակարգիչ խորհրդակցությունը Երեւանում կտեւի մինչեւ մայիսի 29-ը: